ayamun CyberRevue de littérature berbère
12ème année
Numéro 60 Novembre 2012
|
Tadlist nniḍen : http://www.ayamun.com/telechargement.htm |
Prénoms algériens authentiques
Sommaire:
1°) Le texte en prose : “Tuffga taneggarut” tullizt
sɣur Ait-Qasi
Md-Arab, (aḥric2)
2°) L’étude : H. Genevoix, l’habitation kabyle, FDB, Fort-National, 1962
3°) L'article : Azulal di tmedyazt
taqbaylit tatrart, par
Ait Slimane Hamid, Dépêche de Kabylie, 27/05/2012
4°) Langue et Toponymie : TOPONYMES de la region des Qbayel-Ḥḍer,
réponse à notre ami Dra
6°) Tidlisin nniḍen, en PDF : Boudjema
Aziri_Neologismes et calques
Amawal_usneghmes -
vocabulaire_medias.pdf
8°)
Le poème : Nek, win ur neswi, atterǧem sɣur Muḥend At-Iɣil
Adresse
de messagerie électronique
Numéro 60 Novembre 2012
Tufga taneggarut
(Aḥric 2)
tullizt sɣur Ait-Kaci Md-Arab
Ass amenzu mi d-nulfan at
ičumar-agi di lǧama, nennayas, nek d Ḥamid, d ayen ilhan. Ladɣa
nek ur nessin acu i yesseḍwayen di tsertit. Ḥamu neḥma, taḥemmalt
i d-iḥemlen tewwi-yaɣ deg ijufaṛ-is. Nebɣa yark ad tṣeggem
tmurt. Ɣas nxuṣ tamusni, nniya-nneɣ d tin yeṣfan, d tin
zeddigen. Teẓriḍ kullec; ahat tifeḍ-iyi amek i tfehmeḍ
timsal, keč zik d amǧahed. Lḥasun nedda akken ddan yark medden
di tezfuft-nni usirem.
Meqbel ad bduɣ, bɣiɣ
kan ad ak-ed-iniɣ yiwen wawal yesan azal meqren ɣur-i: werǧin
walaɣ albaḍ iḥemlen imawlan-is akken i ken-yeḥmel Ḥamid;
win ur nessin ara Ḥamid ad as-yini d zzux i yettzuxu. Dima iḥekku-yaɣ-ed
amek i teseddaḍ ṭraḍ, keč ur tewwiḍ-ara (20)
isseggasen. Yenna-yaɣ-ed amek i d-trewleḍ si lḥebs, amek i
teččam ucanen, keč d imeddukal-ik asmi i ken-ḥarsen iṛumyen
deg yiwet n temnaṭ deg udrar. Iḥekku-d amek i tzewǧeḍ,
amek i tugiḍ akarni n yemǧuhad, amek i tnehreḍ lkaṛ di
fransa. Zemreɣ ad ak-ed-iniɣ snaɣ ddunit-ik xir-ik. Ula d
tatargit i tuɣeḍ yenna-yi-d amek i tt-id-tessukseḍ seg ufus n
leskeṛ. Yeqqar-iyi-d fell-ak kra n leḥwayeǧ ur yettamen yiwen,
u lemmer ur tessineɣ ara d amẓẓalu aḥeqqi tili ad as-iniɣ
yeskidib.
Nniɣ-ak, ihi. Nedda cwiṭ
yidsen akken ddan wiyaḍ.Tzemreḍ ad d-tiniḍ belli nek ddiɣ
cwiṭeḥ nnig cwiṭ armi yuɣal d aṭas. Ḥamid,
netta ur yettaǧa ula d yiwet n lɣelṭa mebla ma yenna-yasen-tt.
Ladɣa tiḥerṣi i t-ttḥarisen imeɣnasen-nneɣ. Neẓra
leḥkem d afuḥan izleg ayen yark yelhan di tmurt, acukan nekni
nezmer ad nnekk deg-s lemmer ur nettassa yara iman-nneɣ. Mebla ma tettuḍ
belli nekni d widak i d-yekkren s yisem n ddin. Win ur numin ara s Ṛebbi
azizen, ur yezmir ara ad yefhem acḥal neṭṭef di leqran, ur
yezmir ad yessekcem s allaɣ-is belli win yellan d ineslem iweṛ
fell-as ad yeḥkem di ddunit-is s wayen imgaraden d wayen i d-yenna Ṛebbi
azizen. Acu kan ,si tama nniḍen nekni, deg umur usexdem n wallaɣ-neɣ
ɣaf acu i ɣ-ed-i-weṣṣa Ṛebbi di tektabt-is,
nestenyaf adebbuz akked lḥerṣ. Deg umur n tikli s laqel di lecɣal
n tmurt,nekni newwi-tt d tazwawaṭ. Ad as-tiniḍ ilaq ad d-nesɣerṣ
imir-en lmektub seg ufus n Ṛebbi neɣ mulac ad ifut lḥal. Lḥasun
Ḥamid segmi i d-yettbaid fell-asen.Ladɣa asmi ḥebsen tifranin
warraw n leḥram n leskar; fkan afus i yimṭurfa ad aɣ-nehren
sani i sen-yehwa. Qrad(3) isseggasen umbed, tugett n widak yefɣen s amadaɣ
mmuten. Leḥzen ikcem s ixxamen am agu deg ussan n tesmuḍa. Ulac
axxam ur nru yara. Yeqqar-iyi-d Ḥamid belli d lmuḥal u d awezɣi
ad yeḍru wayen akka iḍerrun ma yella ulac albaḍ n cwaṭen
i t-iheggan meqbel.
Lfetna am uqjun
inecfen, ur tezriḍ deg wumi ara yehmej. Imsulta sya, at umadaɣ si
tama nniḍen. Ḥamid yesan taḥanutt di Lareba, ḥala
tasusmi-ines i t-yessuksen seg wayen yesa deg wallaɣ-is. Medden yark
ttqadaṛent ɣef tmusni-ines. Iɣra aṭas n ddin. Ula d
limamat mara erqen, ɣur-es i d-ttaran ad tsteqsin. Tikwal ad ak-yini
ǧǧi-yi ad d-nadiɣ. Ass neɣ sin umbed ad ak-ed-yawi tifrat i
temsalt i tettnadiḍ akked wedlis anda i ttyufa. Acu kan netta yeqqar
dima ɣef yiman-is belli di tmurt ibujaden kra n win yesan timqessin ḥettben-t
medden d axeggaḍ. Netta ulac tama ur t-nezgil ara. Imsulta qqaren-as
ixeddem d wat umadaɣ. Ineggura-yagi qqaren-as iban netta d amsaltu yefren
iman-is. Qqaren-as yesserwel tawacult-is imi yeẓra acu ixeddem. Tidett,
lemmer mači d limam-agi yesnen kra seg imsulta tili acḥal ayagi i
t-qemman. Ma d at umadaɣ, yenɣa-
16
ten s tmusni-ines di ddin. Ansi i s-ed
kkan ad d-afen ur aszmiren ara.
Cfiɣ yewwa-s di lǧama
snejmen-ed lɣaci. Xedmen-aɣ-ed asarag-nsen ɣef “LǦIHAD”
akked “TAƔUṬ”. Nnan-aɣ-ed: “ adabu-yagi amesbaṭli ḥala
rṣaṣ ara t-iɣeḍlen, yenɣa ineɣmasen-nneɣ
di tmesbaniyin. Yewtaɣ, ijarḥeɣ u yeksaɣ rbaḥ n
tefranin. Ɣef ayagi yark i nerfed leslaḥ mgal-is, nessawel i lɣaci
ibuṭin fell-aɣ ad yeddu yidneɣ imi d wagi i d abrid n Ṛebbi,
mači d yiwen nniḍen.” Ḥamid yuɣen tannumi yessusum am
ueggun, inṭeq-ed ass-nni asmi lɣaci ssusmen maṛṛa.
yenna-yasen: “Lǧihad-agi-nwen yeqqim kan dagi ɣur-neɣ. Ibulisen
yark yemmuten d arraw n tudrin-nneɣ. Ula d nutni d imeẓẓula u
d lmumnin, akka am kenwi akken i d-teqqarem. Ad ggalleɣ ur seḥnataɣ
ma teẓram anwa i yesselḥuyen tamurt-agi. Tǧalem d amsaltu ma
yemmut ara-d-yawin dduwla tineslemt. Mi yemmut yiwen ad d-aren mraw(10) deg
umur-is. U kenwi s Wellah igan isem i yiman-is ma teẓram trent seg widak
iṭṭfen tamurt s tidett. A yatmaten i yessalayen timura d tasartit
akked iɣalen i tt-yessebdaden. Immeɣ-ed fell-as imir-en yiwen si
zdeffir, ixneq-it. Widak iḥeḍren din, amezwaru d limam-agi-nneɣ,
negzen ɣer win akken ad as-t-id-kksen si ger ifassen. Yekker din yiwen
uwahruḥu ger imeẓẓula d wat umadaɣ. Amecwaṛ,
limir-nsen, yessusem-iten. (Ass-nni win i ten-iḥebsen d yiwen akken
weqcic iɣran di tesdawit n Blida, issen Ḥamid si zik). Syin ikemmel Ḥamid
awalis, ɣas nitni ur bɣin ara: -lfetna a yatmaten am tḥemmalt
tameqrant mara d-teḥmel; iteddu uzegzaw d uquran. Ayen i d-tufa zdat-es
ad teddem. Ɣurwat ad tǧalem d ageffur ara yezrin ticki. Ladɣa
nekni izedɣen di lǧwahi-yagi n Blida. Ass-agi temmeslayem-aɣ-ed,
azekka ad aɣ-tewtem; yewwas ad d-yaweḍ anida ara ɣ-testewtwem s
uḥlalas.
Dɣa akken i
d-yenna i teḍra. Sin isseggasen umbed,umbed mi mmuten imezwura yeɣran
cwiṭ, uɣalen, widak i ten-iɣermen, am lewḥuc. Adrim yuɣal-asen
am useqqi, smir-ed mebla cceḥa. Efk-asen ayen d ak-yehwan ur ṛebbun
ara, cwiṭ kan ad d-bernen ɣur-ek. Yuɣal uebbuḍ-nsen d
17
acekkaṛ yeqqerṣen. Ternuḍ-as
leḥqara. Ur as-teqqareḍ ara mara twaliḍ lexdayem-nsen belli
widak-agi kren-d mgal leḥqara di tazwara. Ula d tasartit-nsen ur tban
ara. Uɣalen teddun s cceḥa umeslay. Lɣaci akken walan ulac
lfayda deg-sen, bdan a jebden iman-nsen. Mebla ma nettu, keč tezriḍ,
adabu afuḥan i yellan d ssebba n wezgen n warrac yulin s adrar.
Yenna-yi-d Ḥamid belli s ttamada-nsen i yerẓan lluzinat n tmurt,
staxren-ed ixeddamen. Skecmen ɣer lḥebs widak i send-yeqqimen deg
ubrid-nsen, ladɣa widak yeɣran. Ternuḍ-as anda ma teddiḍ
d abaraj akked d wazḍam s ixxamen deg iḍ sɣur imsulta akked
iǧadarmiyen. Akken kan ara cikken deg-k tesiḍ cwiṭ n wul s
inselmen, ad d-asen ad k-qemman seg uxxam am yir aqjun. Rran tammurt d yiwen n
lḥebs ur nesi tilisa. Nek s yiman-iw, azgen n widak sneɣ fɣen s
amadaɣ ur sinen abruy di tsartit, u tugett ger-asen d arrac imectaḥ
yesan gmat-sen neɣ mmi-s n em-nsen fɣen meqbel. Lḥaṣun lfetna
teṭṭef tiregwa n tmurt. Ur walaɣ ara acu izemren ad tt-yessufeɣ
ɣer lxiṛ.
Neẓra tewer teswit, acu kan ur
nxemmem ara tezmer ad taweḍ s anect-agi n lmut. Di tudert n lɣaci,
ulac acu i dyessebganen belli yella win iḥekmen tamurt. Xedmen leḥbus
i lɣaci ur nedda yara di cre. Nɣan yiwen uselway n tmurt mebla ma
yesteqeleq-iten yiwen. zzenzen cwiṭ-nni n lpiṭrul yellan di tniri.
Slaẓen imelyunen n twaculin. Ukren acu yukren mebla ma nezra ibbizeḥ
si temsalin. Ma yella d at umadaɣ kecmen deg yiwet n tebriṭ yettawin
qbala s iɣzeṛ. Ǧalen belli lmut ucebiw neɣ ubulis neɣ
n walbaḍ iselwayen n tɣiwant ad d-yawi kra i umennuɣ-nsen; Ur ẓran
ara belli yal mara nɣen yiwen am akken tawacult-is mara i yenɣan. D
nitni i yettawin lɣaci ad ddun deg udabu mebla lebɣi-nsen. Kecmen deg
yiwet n tekriṭ (violence) tazefrant tadarɣalt, ula d adaw n Ṛebbi
ad tt-yagi. Anect-a s yisem n ddin, am akken d nitni i d-iwekkel Ṛebbi ad
ṣeggmen tamurt; ur ḥusben ara imannsen meqbel ad ḥasben lɣaci.
Wellah ar llan kra ma snen tabruyt n taɣaṭ di ddin… Ddan deg asif i
d-iḥemlen armi uɣalen ugaren asif-nni di lexṣara.
Asmi zedɣen
wigad-agi yessawalen i yiman-nsen imǧuhad di taddart, yeqqar-asen Ḥamid
belli eddan tilisa n cre, ur ilaq
18
ad kken deg win ittqazamen di lbaṭel
akked timuḥeqranit. Yettawi-yasen-d timucuha umcegge n Ṛebbi (TSLF)
akked imeddukal-is; amek ttaǧan tanefsit-nsen deg uxxam, amennuɣ-nsen
ḥala i wudem n Ṛebbi.
Tazwara, walaɣ amek ḥemlen
a t-najin. Ɣas akken d asusam di ṭṭbia-s, ad d-ṛuḥen
ɣur-es ad t-steqsin akken ad ẓren amek i ten-ttwalin lɣaci.
Netta yettara-yasen belli win ara yemmenɣen netta d yineslem am netta, di
sin yidsen ara kecmen ɣer tmes. Imi yiwen yenɣa, wayeḍ ula d
netta yebɣa ad ineɣ. Yeqqar-asen imsulta-yagi tettwalim akked
iserdasen, aṭas deg-sen d imeẓẓula, ttuẓumen,
ttseddiqen, i iḥemlen imawlannsen. Acu kan taswit-agi n lfetna,
tufa-ten-id anda i ten-id-tufa. Ma qqimen-en ḥeṣlen, ma rewlen-d ḥeṣlen
ugar. Tufa-ten-id deg yir lawan akked deg yir amkan. Si tama nniḍen,
nitni ḥekkun-as-ed ɣef leḥbus n tniri i d-snulfan i yimeɣnasen
ukabarnsen akked d usufri i ten-sufriyen yal mara ṭfen yiwen armi tikwal
itettu ccada. Ḥekkun-as-ed amek i neqqen lɣaci mebla cre d waṭas
n tɣawsiwin nniḍen ur iqebel laqel. Seg asmi immuten imezwura yefɣen
s amadaɣ, tuɣal tbeddel tmuɣli-nsen ɣer lɣaci. Uɣalen
ttwalin yark widak ur neddi-yara yidsen d icenga. Yeqqar-iy-d Ḥamid
fell-asen belli rṣas s wacu inɣan atmaten-nsen yesdubbez-asen
ulawen-nsen armi ur zmiren ara ad semxalfen ger lḥeq akked lbaṭel.
Iles-nsen yeččuṛ d ameslay n Ṛebbi, di lawan anda
ulawen-nsen ččuṛen d aḍu n lekfeṛ. Lexṣas n
tmusni n ddin d wayen yenan tudert s umata ikemmel i umxix deg ubaxix. Lḥasun
zegren tilisa n temdanit. Yuɣal ula d adabu mgal i d-kren, iḥemmel-iten.
Imi segmi llan i yesedda yark leqwanen ihudden tamurt. Zzenzen lpitṛul n
tiniri, rẓan lluzinat d tkebbaniyin n ddewla akken ad aɣ-ed-skecmen
ibaṛṛaniyen nessufeɣ s usfel nefka seg idammen-nneɣ i
wasif n tlleli.
Akken i d-yeqqar umeddakel-iw Ḥamid,
yeɣran mači d kra, belli tamurt-agi tesa waqila dawesu sɣur Ṛebbi
azizen. Yečča-tt leǧhel akked tekriṭ. Tuɣal tifenyent
akked weḥwas d nutni i d idles akked lewayed n tmurt. Imdanen deg umaḍal
ttzuxun s leqraya akked d wacu i d-snulfan d wayen xedmen, nekni nettzuxu s
ubbulun i d-nuker si lluzin anda i nxeddem neɣ s wacḥal n swaye n
tguni i neṭṭes di tkebbanit ansi i d-nettawi rrezq-nneɣ...
Yewwa-s, iḥka-yi-d belli yessen yiwen weqcic ittaker-ed adlisen seg uɣerbaz
anda yeqqaṛ. Ɣas akken d takerḍa, i k-yenna Ḥamid, acu
kan ifṛeḥ imi d adlisen i yesa deg allaɣ-is a ten-id-yaker.
Acu kan yeḍsa mi s-ed-nnan belli yessexdam-iten i usiɣi n tmes di
tegrest, ladɣa ma yili ulac aǧarnan deg uxxam.
Deg usseggas-agi yezrin, tuɣal
texṣer tegnitt, ger-aɣ akked d at rrebrab-agi yellan di temnaṭ-nneɣ.
Zik xerṣum ttmeslayen s yisem n wegdud, ɣas neẓra ɣelṭen
aṭas di tufɣa-yagi-nsen s amadaɣ. Wanag tura uɣalen d
iferunen fell-aɣ, ccukren armi qrib ɣelben win d wimi ttnaɣen.
Aneggaru-yagi netta, ifaq-asen, ur tesiḍ acu yellan deg-sen, dɣa
yunef-asen ad xedmen ṛṛay-nsen.000000
Dɣa, ṛṛay-agi-nsen
amewaǧu iḥuza-yaɣ-ed nekni d imezwura. Ur ẓriɣ ara
amek i d-ssufɣen fell-aɣ, nek d Ḥamid, belli nettawi-yasen
isalen i yiserdasen n Blida. Ceggen-aɣ-ed a nesers iman-nneɣ. Nekni
ncegge-asen belli ɣelṭen aṭas di leḥsab-nsen fell-aɣ.
Si tama nniḍen lɣaci uɣalen jebden-d imannsen seg-sen anagar
win yettwaṭfen deg umerdax-nsen seg iḍaren ar umelɣiɣ.
Nuɣal seg ixeddim s axxam,seg
uxxam ɣer lǧama, si lǧama s ixeddim. Lḥers segmi irennu
fell-aneɣ. Nettḥalfu-yas yal tikelt ara d-imuqel ɣer-neɣ
walbaḍ imezdaɣ n taddart. Nuɣal nettraǧu kan asmi ara-d-zeḍmen
s ixxamen-nneɣ ad aɣ-awin. Ladɣa Ḥamid i wumi i tt-ṭṭfen
d tuḥsift seg asmi yettnaɣ yid-sen di ddin, di temsalt-agi n
lǧiḥad ger inselmen. Ziɣ nitni yeččuṛ wul-nsen
seg uɣuccu akked ttaṛ. Ahat qqaren-as ma yella nzemm-as i wagi
axenfuc-is am akken tamsalt-nsen ad tuɣal imir-en d tamsalt n lḥeq.
Syin ad d-llint tiwwura n rbeḥ mgal adabu-yagi ifɣen i webrid n Ṛebbi.
Nḥulfa-yas i
tfidi yewwḍen s iɣes asmi yennuɣ Ḥamid di lǧama,
netta d gma-s n yiwen si cyufa n widak ifɣen s amadaɣ di temnat-nneɣ.
Nnuɣ-en ɣef tmezliwt akked timenɣiwt s rṣas, anta i d
ssuna. Winna yeqqar-as belli d ajenwi i d ssuna. Ḥamid yettara-yas belli
ma yella dɣa terra-k tmara yewwas ad tenɣeḍ albaḍ, ulac
acu yifen di tezdeg tarṣast si deffir temgaṛṭ. Winna
20
yewwi-yas-tt i tarbat n gma-s akken
kan teḥma. Ur d-yeɣli yara yiṭij uzekka-nni mi s-ed-tewweḍ
tebratt belli ɣas ad d-yaɣ lekfen i yiman-is.
Nek, nniɣ-as : “arwel ɣef
yiman-ik ɣer temdint n tmenɣast”. Yerra-yi-d belli ur izmir ara ad
yeǧǧ taḥanutt-is s wacu yettawan aṭas tawacult-is, ladɣa
sin watmaten-is imeqranen i t-yeḥwaǧen aṭas. Ternuḍ-as
yesa kra uttalas yettwalas, ilaq ad tyer di kra n wagguren-agi i d-ittedun.
Akka ihi i tella, u si tama nniḍen ur yebɣi ara ad as-ksen taẓana
warrac-agi iweṛten Ṛebbi azizen deg akal. Ur zmireɣ ara ad
ak-iniɣ amek i d-iḍebber timegḥelt. Yenna-yi-d belli yurga
yewweḍ-ed lajel-is; ur yebɣa ara ad as-kksen lmenṭeq mebla ma
yerra ɣef yiman-is. Yeqqar-iyi-d yugad Ṛebbi ad t-iḥaseb, acuɣer
yunef i wigad-agi yefɣen abrid-is ad xedmen ṛṛay-nsen mebla ma
yenna-d kra.
Neqqim akken aṭas n wagguren
nettasa ɣef yiman-nneɣ. Yal mara nekker ad neffeɣ seg uxxam ad
nefk tiṭ ar baṛṛa meqbel tufɣa seg ufrag. Nettnejmaed
zik seg ixeddim; di lǧama nessusum ɣas ma yella win i ɣ-ed-ilaǧen.
Acu kan simmal ileḥḥu wakud, simmal nettḥalfu s taẓin n
wemxix i ɣ-yettarǧun. Tuɣal Lareba akked d Blida d annar umennuɣ
n yal ass. Lbumbat ṭṭerḍiqent di yal amkan, ibulisen ɣellin
am iweḍfen, arrac ur nessin d acu i d tasartit ttwaṭfen d ihdumen ɣer
lḥebs di lbaṭel. Ad tiliḍ deg webrid tleḥḥuḍ
am lmalayek, deg yiwen umecwaṛ ad ak-refden ininǧaten s anda ur
d-tettuɣaleḍ ara. Si yal tama tinebbacin n lmut ad d-senɣarent.
Deg ass leklacat n udabu refden asenǧaq-nsen, Deg iḍ ijenwiyen n at
umadaɣ tettṛefrif tbeḥnuqt-nsen deg igenni. Lɣaci maṛṛa
ṭṭfen iebbaḍ-nsen. Win yesan sanda ara yerwel dayen irwel,
wiyaḍ ttraǧun s usirem yefren ad ieddi ubaxix-agi mebla ma iḥuza-ten.
Lfetna tcerreq iḍaren-is
ɣef tmurt yuli ubuseṭṭaf. Laẓ, lqella ixeddim, aṣarɣi,
leḥqara, takarḍa, ibaṛajen, tarewla, timezliwt, tullas
yeǧlen, imeṭṭawen, awaz, taessast, tineṭlin, aduxu,
crab, lkif, tiwwura n wuzzal, alejlej, iserdasen, ibulisen, iǧadarmiyen,
irebraben, at umadaɣ, ininǧaten, lluzinat yeṛɣan, lluzinat
imedlen, iɣerbazen yessusmen, arrac iselben, imɣaren yenḥafen,
ddin irewlen, imusnawen yessusmen, imusnawen
21
yemmuten. Anect-agi yark d wayen nniḍen
i yuɣalen d talaba n tmurt. Yeqqar-iyi-d Ḥamid s taḍsa belli
cwaṭen n tmurt yellan ttwaqnen, tura fsin-ed si rrebg-nsen. Kra ulin s
adrar, kra lsan tikaskiḍin.
Ṛuḥen-d rrebrab ɣur-es
asmi akken neǧel dayen ttun-aɣ. Ur t-id ufin ara. Nnan-as i yiwen si
lǧiran-nwen ad as-yessiweḍ izen i Ḥamid belli tikelt-nniḍen
mara d-uɣalen ɣas ad iheggi iman-is i yinig ɣer tmes n
ǧahenama. Ma yella nniɣ-ak ẓriɣ ayɣer yeqqim ur
yerwil ara, neɣ amek i d-yuɣ timegḥelt skadbaɣ-ak. Wanag
netta iban-iyi-d ussan ineggura amzun d win ittheggin iman-is i lmut. Yuɣal
yal mara isers anyir-is di lqaa zdaxel n tẓallit, ur d-yettali yara alama
nɣil waqila yemmut dayen. Yuɣal cwiṭ n lehduṛ i necrek
yekkes-iten. Iles-is ilha-d d unebder n Ṛebbi di yal dqiqa yezmer ad iḥaref.
Yenna-yi-d yiwen ubrid belli ur yebɣi yara ad yeglu yides s imeslayen ur
nemin ara. U mi t-steqsaɣ ɣef tmegḥelt, yerra-yi-d belli xerṣum
ad t-agaden cwiṭ, ur yettak ara iman-is d asfel i yicengga n Ṛebbi.
Iṭij yuli-d aṭas n tikal,
yeɣli aṭas nniḍen. Amdan ittḥar ad yettu, ladɣa
ayen ur yeḥmil ara. Nettu daɣen imcumen-nni. Nuɣal am zik-nneɣ:
axxam, ixeddim, lǧama. Acu kan nitni ur aɣ-ttun ara. Seld iḍelli,
mi d-neffeɣ si lica, nufa-d yiwen wehdum yessewḥacen n rrebrab la ɣ-ttraǧǧun
zdat tewwurt n lǧama.Ur nṭiqen ɣer yiwen. Iban am yiṭij
deg uzal unebdu d nekni i dqesden. Nereḍ imir-en amek ara nesenser ɣer
zdaxel n lǧama akken a nerwel syin, nufa-d deffir-neɣ sin ijaluten i
wumi rkant leḥwayeǧ, leklacat deg ifassen-nsen. Rran-ɣ-ed sani
i bɣan, akken i d-yettara umeksa ulli-s. U deg yiwen umecwaṛ nufa-d
iman-nneɣ nettwarez s yiwen n sselk azuran seg ifassen ɣer zdeffir.
Ula d cced-nsen isbeggened acḥal arɣan wulawen-nsen fell-aɣ. Ḥulfaɣ
i yifassen-iw qrib ad gezmen. Ur zmireɣ ad ten-ssembbiwlaɣ wala ad
ten-ǧǧeɣ akken. Zzuɣṛen-aɣ-ed ɣer tlemmast
n taddart s tmegḥal-nsen akked ijenwiyen-nsen am tejlibt izamaren. Mkul
tikelt ara nereḍ a nmuqel ɣer deffir neɣ ad d-nini lḥaǧa,
ad d-ters deg-neɣ tiyta s tebbuṭ ujenwi s azagur neɣ tiyta
uekkaz s aqerru.
Werǧin xemmeɣ
belli yezmer ad yaweḍ wass ideg-i ara ɣ-
22
ed-qerben, nek d Ḥamid. Imi
nekni d sin yemdanen yexḍan cwal. Ɣas akken, tikwal yettara-yasen s
txenfuct mara t-id-laǧen. Nuɣal nessusum armi uɣalen lɣaci
la ɣ-ed-ttmuqulen amzun d sin iḥarcen; nelha-d kan d lecɣal-nneɣ,
ur nettaweḍ ula d yiwen. Ziɣemma Ṛebbi aḥnin yeẓra
ur aɣ-tzegel ara tbuciḍant-agi n rrebrab i d-ihedfen ɣef tmurt.
Assa, zemreɣ ad d-iniɣ belli
walaɣ imir-en iman-iw d win yemmuten. Tekmumec tasa-w am tin n tyaziṭ.
Lliɣ ugadeɣ ad d-sarḥeɣ i waman n tasa zdat warrac-nni ur
neswi yara tibṣelt yerkan. Si tama-s Ḥamid ikemmel iheddeṛ
yidsen am widak yessen si zik, amzun acemma ur yelli. yeqqar-asen: « a
yatmaten, xzut cciṭan, aqla-ken ad tenɣem sin ur nuklal ara. Lameṛ
nettekka ula deg ulac. Ɣas aneft-aɣ ad nṛuḥ s ixxamen-nneɣ
am akken acemma ur yeḍri.» Nitni ččan akaṛbil. Deg
imawen-nsen ḥala imeslayen rẓagen i d-sxelḍen d kra imeslayen
n ddin i sen-d-sḥefḍen cyufa-nsen. U lɣaci yellan din bɣan
ad d-skecmen iman-nsen lemmer mači d imcumen-nni i yewten metwal-nsen aḥlalas
d rṣas. Uɣalen ur zmiren ara ad asen-bedren ula d yiwen n wawal imi
ur ttaǧan yiwen ad asen-yehdeṛ. Ula d limam-nneɣ, yellan dag-I
d anagi, qrib i t-id-nɣan mi n-iṛuḥ ɣur-neɣ ad
asen-yessefhem.
Teɣzi n yiḍ, nitni d asufri
deg-neɣ. Uraren yess-neɣ akken yetturar wemcic s uɣerda yettwaṭfen
deg umerdax. Nek yeffeɣ-iyi laqel. Wannag Ḥamid ittban-ed am win i
sen-izemren. Dɣa mi bdan tiyta deg-neɣ akked uḥettet ma yella
kra ad d-en-ini iɣemez-iyi-d Ḥamid amzun d urar i netturar.
Yenna-yasen : « a yatmaten ma yella dɣa tetewlem ad iyi-tenɣem,
ttxilwat ur d ineqqet ara nek d wagi. Imi wagi-nwen. Si zik iḥemmel-iken.
Ahat d netta s yiman-is i dyesnulfan fell-i lexbaṛagi ur nṣeḥa
yara fell-i. Ma yella tebɣam ad tenɣam enɣet-ett weḥdes,
mači yidi.
Tikelt tamenzut ur
as-fkin ara azal i wayen i d-yenna fell-i. Acu kan segmi yeṭṭef di
rregmat deg-i belli nek d yiwen segsen, wwḍen alarmi tumnen belli nek
yides mači d imeddukal. Si tama nniḍen, nek yufa-yi-d lḥal,
teǧǧa tezmert iẓuran-iw iččan tiytiwin n ugar n mraw
(10) iterassen illuẓen idammen. Ẓriɣ-t d win yebɣan ad
iyi d-yessukes seg ifassen n cwaṭen-nni. Nek
23
kecmaɣ imir-en deg yiwet n tsusmi
lqayen anda ḥala nnehtat imeṭṭi i wumi sellaɣ yettal-id
seg-i. Ḥamid, ad fell-as yafu Ṛebbi, yesbeṛ-asen i lewḥuc-nni
makken i d as-sɣarṣayen leḥwayeǧ yellan ɣef yiri-s
akked mi d as-ssaɣayen times deg iḍaren-is akken ad d-yenṭeq
ma yella kra yeẓra.
Meqbel tafejrit, walaɣ yiwen
akken n wemɣaṛ bu tčamart tamellalt i s-ed yewwḍen ɣer
tmiṭ, mi d-yusa s wezmumeg n llufan ɣef icenfuren-is. Iddem-ed
ajenwi si tmuẓiṭ-is i d-yewwi ɣef tuyat. Yekka-d deffir Ḥamid
yellan ur iban d acu yeqqar deg ulis, syin isedda-yas-ed leqḍa ujenwi ɣef
temgarṭ-is tazedgant.
Ur zmireɣ ara ad medleɣ
allen-iw. Lliɣ nezɣeɣ deg allen umeddakel-iw i d-yettmuqulen ɣer
tama-w. Mmektaɣ-ed imir-en asmi akken i yi-d-yeqqar belli netta yessaram
ad yemmet d amǧahed am widak yemmuten di lgerra n Fṛansa. Ḥulfaɣ-as
imir-en belli anecraḥ n wallen-is umbed mi d-yessufeɣ ṛṛuḥ
yessebgan-ed am win iwweḍ-en lebɣi-s. Bdiɣ acihed, mebla aḥbas,
ttraǧuɣ amɣaṛ-nni n cmata yerran iman-is d imcegge n Ṛebbi
deg akal ad d-yass ɣur-i akken ad iyi-yezlu ula d nek.
Ur umineɣ ara iman-iw mi sliɣ
i ccif-nsen, yessawal-asen akken ad kkren ad sahlen. Ur umineɣ ara iman-iw
mi d-tkakiɣ ger ifassen n limam-agi nneɣ. Yettraḍ ad
iyi-d-yekkes sselk s wacu i yi-cudden ifassen s azagur.
Iḍ-nni, ad
tecfu fell-as taddart. Tacalawt teṭṭef win akken i syeqqaren i
uzal nek d Uzzal. Ḥulfaɣ i yiman-iw am win i d-yuɣalen si
seddaw wakal. Sliɣ meqbel tadyant-agi belli widak yark i d-yessuksen seg
ufus n yemcumen-nni uɣalen am widak iselben. Ayen yemgaraden aṭas
deg ayen yeḍran yidi seg imir-en tuɣal-iyi lmut am tebbuct n temɣart
ansi i d-teṭṭḍaɣ am llufan tazmert i tudert-iw. Ɣas
akka yemmut, ass-a, umeddakel-iw, ẓriɣ mači aṭas i yi-d
mazal ad rnuɣ ɣur-es sanda yella. U ẓriɣ daɣen belli
amḍiq anda yella tura yif tizeṭ n ddunit-agi ma yefka-yak-tt yiwen
di tidikelt ufus-ik.
…………………………………………………………………………
……………………………….
……………………………….
D netta i yesmaren talweḥt n
wakal tamezwarut ɣef yeblaḍen iɣummen mmi-s iḥeml ugar n
yiman-is. Si zik yettwehim deg uqcic-agi i s-ed-yefka uxellaq d asusam isnen ḥala
lecɣal-is. Yettwari-yas-ed Ṛebbi am win ittasmen seg-es.
Ass-a, hat-an yeẓẓel am
ujebbad deg akal asemmaḍ, deg uxejiḍ yedreɣlen. Iban-as-ed
imir-en am yiṭij deg uzal, ifhem d netta yark i yeḥmel aṭas
deg arraw-is. Tasusmi yellan ger-asen akked wakal-agi azeggaɣ n tenṭelt
yesnerna deg ul-is leḥmala yesa ar ɣur-es. Akk diɣen yesnerna aɣuccu
n widak i t-yenɣan akka d ilemẓi.
Mi yekfa limam asarag-is s wawal: «
nekni n Ṛebbi, ad nuɣal ɣer Ṛebbi.» Yefka-yas-ed awal i
baba-s n win yemmuten akken ad d-yini awal aneggaru.
Mass Qebbani yebda-d imir-en
ameslay-is. -Ad neḥmed Ṛebbi ad t-neckeṛ ɣef ayen i ɣ-ed
yefka d wayen i ɣ-yekkes. Yal yiwen deg-neɣ yura-s Ṛebbi azizen
alayan acḥal n wussan ara yedder di tkurt-agi n wakal. Yiwen asseggas,
wayeḍ lqern, ḥala Ṛebbi s tmusni-s i yezṛan ayɣer.
Acu kan mara tili d lmut n Ṛebbi nsebbeṛ nessusum.
Issusem imir-en mass Qebbani. Imuqel s
agraw-nni n lɣaci i d-yusan si tudrin-nni i d-yezzin i Lareba. Seg imɣaṛen
iccurfen s arrac imectaḥ, ussan-ed ad ḥedṛen i tenṭelt
n yiwet n teqquct n wezrar yugin ad yeḥbes tiɣerṣi. Yulwa
wudem-is seg uwaz n sin wussan. Yuɣal amzun d aceṭṭiḍ i
wumi yexsef waṭas n tnelwa akked lexyuḍ. Tamxixt ideg yezzer ass-a,
yeẓra d taluftis weḥdes kan. Imuqel tikelt-nniḍen ɣer
widak i d-yusan ɣer lǧanaza. Aṭas i yeqel seg widak yessen zik.
Syin ikemmel ameslay-is: -Ḥamid, ad fell-as yafu Ṛebbi irḥem-it,
d yiwen ur neḥmil ara lbaṭel. Ɣas d netta i d amaẓuz ger
warrac-iw, zemreɣ ad d-iniɣ d netta i d lemxiyeṛ ger-asen.
Din ulint-ed tmeqwa
n waman imerɣanen ɣef yiri n wallenis, taɣect-is tṛuḥ
am tin ibḥebḥen deg yiwen umecwaṛ: -U widak i t-yenɣan d
arraw n leḥram, ur nessin d acu i d Ṛebbi wala acu i d ddin-nneɣ
azedgan. Tasartit d lqella n tmusni
25
sderɣlen-asen allen-nsen. Tecfam ɣef
asmi akken yella lǧama ḥala imɣaṛen i t-yettačaṛen,
netta di lmeṛ-is akken kan yessaweḍ tza (7) isseggasen, i yekcem
yettẓala yid-sen. Aɣilif-is ameqran d amek ara iseddu tudert-is deg
ubrid n Ṛebbi. Wammag, widak-agi i t-yenɣan am lewḥuc, llan
ttmenṭaṛen s tquṛar n crab deg ifassen-nsen, zennun, ttakren,
ssexṣaṛen asmi netta yufa-t-id lḥal icab di tigduda tineslemt
iga deg ul-is. Ay atmaten bɣiɣ ad asen-tinim belli snaɣ
ismawen-nsen yiwen yiwen u ddunit ɣezzifet akken ad arreɣ ttaṛ-iw.
Init-asen anda ma ddan afus-iw ad ten-yaweḍ s axjiḍ-nsen am yemṣaṣa
i d-yessufuɣen tiɣirdmawin seg uxjiḍ-nsent.
Syin yessufeɣ-ed yiwet n tewṛiqt
ansi i d-yeɣra ugar n mraw
(10) n yismawen n widak yettekan di
lmut n mmi-s. Dɣa ikemmel lehduṛ: -Lemmer d yiwen i d-yusan yenɣa-t
s tarṣast s aqerru, ahat ad sebbṛeɣ; ad as-iniɣ liḥala
n tmurt i d-yennan akka, yura-tt Ṛebbi azizen; neɣ iwweḍ-ed
lajel-is. Ala widak-agi, adawen n Ṛebbi, ussan-ed s lemzegga n taddart.
Teɣzi n yiḍ i ssufriyen deg-s meskin. Ssarɣen-as ula d iḍaren-is
lewḥuc-agi i wumi ur iṣub ara leqran seddaw tgaṛjujt-nsen.
Iqqim-asen kan d awal aḥarfi sufella n yiles. Ttkellixen i lɣaci
belli ɣef wudem n Ṛebbi i ɣef ttnaɣen. Netta Ṛebbi
yeẓra belli ɣelben cciṭan di lbaṭel xeddmen. Ad asen-iniɣ
belli nek ṛzan-iyi ul-iw, u ɣef aya ttaṛ-iw ḥlal segsen.
Anda ma ddan, di ddunit neɣ di laxeṛt, yewwas ad hemjeɣ deg
ulawen-nsen alamma ggezreɣ-ten, akken ccaḍen ass-agi ul-iw.
Yenna-yak Ṛebbi azizen di leqran, win ara yenɣen yiwen n wemdan
mebla ssebba am win ara yenɣen imdanen maṛṛa. Taggara-s d
times n ǧahenama ansi ur d-iteffeɣ ara i lebda. Deg umur ad ṛuḥen
ɣer widak iččan tamurt di sṛayat-nsen, lhan-ed d igellilen
akked iẓawaliyen, ad ten-ttḥeqqiren akk ad t-neqqen. Ad asen-iniɣ
abrid-agi d abrid n lbaṭel. Ur tezmireḍ ara ad d-tawiḍ ayen
ilhan s webrid ucmit. Awal-iw ɣer da i yekfa, a Ṛebbi suref-iyi anda
ɣelṭaɣ. Yessusem seg imir-en.
Yuɣal-ed lɣaci
s tsusmi iqebṛen si tmeqbeṛt. Iwweḍ-ed yiwen ilemẓi ɣer
tama n limam i yellan ileḥḥu s leḥzen di tlemmast n lɣaci,
yenna-yas s ameẓẓuɣ makken yennezrureb di
26
dqiqa am umulab di tlemmast n wehdum
ileḥḥun. Ur yefhim ara imir-en limam acu i d-yeqsed s imeslayen-agi
:« ina-s i Qebbani ass-agi ad d-nawi lqeḍ-is».
Yuzzel-ed imir-en ɣer mass
Qebbani i yellan ileḥḥu ɣer tama n umeddakel n mmi-s akked
yiwen seg arraw n lemum-is. Akken yewweḍ limam ɣur-es, yessefhem-as
s usqewqew belli tura i d-iṛuḥ yiwen seg ilmeẓyen i d-ceggen
at umadaɣ, nnan-as-ed belli ass-agi a t-nɣen. Uɣalen wudmawen n
widak i dyeddan ɣer tama-s d iwraɣen amzun yuli-ten-id waṭan.
Icmumeḥ-as-ed imir-en mass Qebbani armi i d-banen uglan-is n daxel.
Yelḥa yizen-agi ger lɣaci
am uɣemɣum deg ass n tegrest. Taddart yark tesla belli at umadaɣ
bɣan ad nɣen mass Qebbani. Tikelt-agi, akken ma llan yark lɣaci
i ḥeḍṛen, ḥulfan i wayen akka iḍeṛṛun
d lbaṭel aḥarfi. Ɣas s tufra kan, heddren yark belli mači
d lḥeq ad tenɣeḍ aqcic syin ad ternuḍ baba-s imi i
d-yenna kra imeslayen i t-iqerḥen. Acu kan, si tama nniḍen, ur sin
acu izemren ad xedmen imi ula d nitni ulac acu ara sen-iḍemnen ur
d-tezzin ara yewwas fell-asen. Widak iḥarcen, dayen deg allaɣ-nsen aṭas
i telḥa tikti unejli si taddart. Qqaren, ger-asen d yiman-nsen, ahat ad
d-uɣalen yewwas asmi ara teddi taluft-agi. Ẓran makken inɣan
aqcic-nni n Qebbani, win akken ur netteki la di tmecṭaḥ la di
tmeqranin, dayen ulac acu izemren ad d-yeṭṭef imexlaq-agi ɣef
tufɣa seg ubrid n Ṛebbi.
D awezɣi ad qqimen ur d-tezzin
ara fell-asen yewwas. Lfetna tga am usemmiḍ, tzemreḍ ad as-tḥalfuḍ,
tamuɣli ur tt-tettwaliḍ ara. Ur tesi acu ara tt-iqazmen, themmel am
yilef yettujerḥen, themmej deg uzegzaw akked uquran.
Deg uxxam n limam,
mass Qebbani yeččuṛ s tira qrad (3) n tewriqin. Syin yerra-tent
ɣer qrad (3) n tjellabin anda yura tansiwin n warraw-is akked tansa n temeṭṭut-is
yellan di tmanɣast. S wecmumeḥ yugin ad yekkes tura seg udem-is,
imudd-itent i limam i s-ed-yennan: -a si Ḥmed, mači d ṛṛay
tiɣimit-ik dagi, ass n wass-a. Siɣ yiwen umeddakel-iw di Blida, s lfeṛḥ
ara k-yessens ɣur-es sima ara d-yaweḍ wass n tmesrifegt ara k-yarren
ɣer tmenɣast. Akken ur aɣ-ed-ttwalin ar medden, ad tgezmeḍ
seg uxxam-iw ayla lḥaǧ
27
Mussa yettawin s abrid. Ad as-iniɣ
i Mulud, mmi-s n xalti-k ad k-yarǧu s ufergu-s. Ulac anwa ara yeẓren;
di semmus(5) n dqayeq, ad asen-tezmiḍ qeḍran s allen i widak i d aɣ-iɣuccen.
Ma d wigi akka zama yefɣen abrid n Ṛebbi, d Ṛebbi ara tenisnegren
ma yebɣa ncallah.
Igzem-as-ed imir-en mass Qebbani awal:
-A lḥaǧ Smail, lxiṛ-ik meqqer aṭas, tbeddeḍ yidi
am gma, ur ẓriɣ amek ara k-ed-rreɣ ula d ibizzeḥ seg-s. Ẓer
kan, arraw-iw ad fehmen tamsalt ma yella tessawḍeḍ-asen
tibratin-agi-nsen. Nniɣ-asen ad d-lhun d yanbabat-sen akked
yessetmat-nsen. U rniɣ-asen ayen yark ẓriɣ ɣef widak yenɣan
gmat-nsen. Nutni ad muqlen acu ara xedmen asmi ara tefru. Inṭeq-ed
imir-en limam: -Ahya gma! ini-iyi-d, yakk ur tebɣiḍ ara ad t-ceggeḍ
arraw-ik ɣer lfinga, wa d-teǧǧeḍ tameṭṭut
akked snat tuqrar i laẓ akked lemḥayen. Ṛuḥ kan xdem
akka i k-ed-nniɣ; Ttaṛ mači dayen ara ifuten. Yernu xerṣum
lemmer i d as-nezmir.
Yerra-yas-ed:
-Yakk, keč a ccix d win iɣran leqran. Teẓriḍ d Ṛebbi
i ɣ-yuran acḥal n wussan ara neseddi di ddunit. Ma yella ass-a i
k-yura, ass-a ara temteḍ, ma yella umbed lqarn, ihi umbed lqarn. Ur
tezmireḍ ad tzadeḍ wala ad tesneɣseḍ ula s dqiqa. Ihi a
gma, lḥaṣun ass-a dagi ara ternuɣ. Ma bɣan cwal aqli-yi
dagi ɣur-sen. -a si Ḥmed ur asen-tezmireḍ ara. San timegḥal;
ttidiren di tẓegwa. D tidett, nutni ma bɣan albaḍ ishel ad
t-awḍen. Ma yella win i ten-yebɣan ulac anda ara yaff ṛṛiqa-nsen.
Yernu ahat tecfiḍ fell-asen. D widak-nni zik yettmenṭaren di
taddart. Uɣalen tura sersen-d rrehba di tuddar-agi-nneɣ...Tazwara,
nezmer ad d-en-ini san ssebba ma fɣen mgal adabu, acu kan syin uɣalen
ɣelben-t di tlufa i d-itekken seg-sen. Aɣbel-nsen ameqran d timenɣiwt;
Ǧalen ma yella nɣan aǧadarmi neɣ abulis yella kra i snernan
di temsalt-nsen. Ṛebbi yeẓra d adabu i ten-iḥetmen ad fɣen
s amadaɣ deg aṭas n tikal. Azgen n widak yefɣen, fɣen si
tagdi n lḥebs akk timenɣiwt mebla ma eddan di cra. S kra n win cikken,
imsulta, deg iḍ (s timelsa n lininǧa) ara d-ṛuḥen ad
t-leqḍen seg usu. Dɣa seg imir-en, ulac abrid ar win ara yawin.
Yeffeɣ-ed yizen belli neqqenten, mana anwa izemren ad
28
yetḥeqeq. Acu kan daɣen
widak-agi yefɣen, ad twehmeḍ ayɣer, ifeɣ-iten laqel seg
asmi fɣen s amadaɣ. Ad as-tiniḍ d ttaṛ i bɣan ad
d-arren si lɣaci ur neddi yara yid-sen. Ternuḍ-as lqella n tmusni di
ddin-nneɣ. Uɣallen ḥarsen-tt yiwen n weḥras di ddin, u
lemmer ad d-tawiḍ imeddukal n Nnbi (Taẓallit d slam n Ṛebbi
fell-as) ur tt-ttelliken ara ger-asen. Kullec-nsen ikeffu s ujenwi. Ugadeɣ
a gma, qrad(3) isseggasen-agi yezrin ad ifen widak i diteddun. Mkul maṛa
ẓẓallen deffir-i di lǧama qqareɣ-as kan tura ad yekker
yiwen seg-sen ad i-yezlu si zdeffir.
Ters-ed tsusmi ger sin imeddukal yewet
zman ɣer iɣisan. Ula d yiwen seg-sen ur ixemmem ad d-yaweḍ wass
icuban wagi. Ass-a, tamurt tuɣal d annar n ilefḍan akked wammus.
Idammen uɣalen ttmirin akken yettmiri ugeffur anda nniḍen.
Werǧin meyzen belli yezmer ad d-yaweḍ wass anda d arracnsen ara
sen-yuɣalen d iwaɣezniwen, yerna s yisem n ddin ttwalin si zik d
azedgan. D tidett ula d nitni fɣen yewwas s amadaɣ. Llan meẓẓiyit,
u ass-nni iban anwa i d acengu. Ɣas yeḍra lbaṭel di kra imeḍqan,
di tugett n tegnatin amennuɣ-nsen iban am aggur deg ass n tziri.
Imir-en seg yiwet n texxamt d-isuman aḥanu,
teffeɣ-ed yellis limam tamectuḥt, tin akken i sen-d-yewwin iḍelli
latay. Yexenčew yark wudem-is seg imeṭṭawen; iban ula d nettat
ur teṭṭis ara. Tenna-yas i mass Qebbani s yiwen n ṣṣut
yeṭenṭunen am ddkir: -Ḥamid iffer timegḥelt-is deg
yiwen uxjiḍ iɣaz seddaw lamusyas n wuzzal. Ad tafeḍ yerra s
ufellas qrad(3)n tkarlajin timeqranin. Ma yella kra yellan ddem-itt-id.
Ikker baba-s imir-en ɣur-es, iṭṭef-itt-id
si tuyat-is, syin yerratt s leḥder ɣer texxamt-nni ansi i d-teffeɣ.
Yufan zdaxel yessetma-s yeqqimen s tsusmi d leḥzen. Dɣa irfed-ed
taduli. Syin yesɣim yelli-s, iṭṭanez, yekkes-as tibacmaqin-is.
Yeẓẓel-itt deg ussu-s dɣa yessuden-itt-id seg unyir-is.
Yugi mass Qebbani win ara yeddun yides
s axxam-is, umbed mi d-yelqeḍ cwiṭ si lmakla i s-ed-sersen d imensi
deg uxxam umeddakel-is. Deg ubrid-is yemlal-ed aṭas lɣaci i dmazal
ur kcimen ara s ixxamen-nsen. S kra n win i d-yemlal isellem-ed fell-as.
Segmi yesla i lmut n mmi-s, ur t-id
tekka tiṭ. Dɣa tura makka yekfa kullec yebɣa ad yeṭṭes
taguni iḥeqqiyen; yebɣa ad yeṭṭu belli ččan-as
tasa-s widak-agi ur nessin ara Ṛebbi. Ixemmem belli akka tura ad yeweṛ
ttaṛ seg-sen. Acu kan ad d-yaweḍ wass ideg-i ara d-ters talwit, u
widak yettekkan yark deg usufri akked tmezliwt n mmi-s, ad xelṣen
imir-en.
Yenna ger-as d yiman-is, ad yesseqwi
di tẓilla-s asteqsi n Ṛebbi arma d ass ideg-i ara s-ed-yemmel amek
ilaq ad asyeddu i temsalt-agi-ines. Acu kan ass-a d ass n tguni. Taguni iḥeqiyen.
Ṭwiqan yark n wexxam san icebaken
n wuzzal. Tawwurt ula d nettat n wuzzal; ẓẓayet aṭas. Yenna
ger-as d yiman-is belli mmi-s yeẓra acu i iḍerun. Degmi i iḥerrez
yark akka i wexxam. Syin iṛuḥ ɣer texxamt anda sarsen legrawez
yark n wexxam, imi ǧǧan amḍiq i yimewuza. Am ugecmuc yeqquren iḍegger
imanis mass Qebbani ɣef umeṭṛaḥ amezwaru i iwala
zdat-es.
Akken kan dɣa isers aqerruy-is ɣef
tsumta iwala zdat-es am tilibizyu arraw-is asmi llan d imectaḥ; ass-nni ḥala
arrac i dilulen. Lḥara n wexxam tettban-asen-d am yillel. Ulac acu ur ten-nettawi
si teɣmert ar tayeḍ. Tturaren timbbufra, alqafen, tuqqar, ddabax,
illelucen, tiḥjuṛin d tcirett, amrar d waṭas n wuraren i
d-snulfuyen yal ass. Yemmat-nsen si ṭṭaq n tkuzint tettassa-ten-id
ma yella i ten-yettaɣen. Imekta-d imir-en belli Ḥamid asmi yella d
amectuḥ ur yemxallaf ara netta d watmatenis, imi incef anect-nsen neɣ
tikwal ugar nsen. Deg ussan-nni, mass Qebbani yeṭṭef ixeddim di
lluzin yellan di Lareba. Ɣas yeweṛ cwiya ixeddim, allaɣ n lɣaci
yers, ulac imiren tilufa-agi i d-yennulfan tura. Imir-en ččan medden
aɣrum armi i t-ṭeggiren. Degmi yettru tura mi yettnezzih deg
ussan-nni anda nniya n wulawen tettemyezwar nettat d tizeṭ n tmuɣli
deg arrawis. Ur yeẓri yara tura ma yella d amekti i d-yettmekti neɣ
d anekcum i yekcem di targit. Ula din yegguma ad yessekcem tidyanin yeḍran
tura d warraw-is.
Yugi ad d-yemmekti
belli yiwen seg-sen hat-an yeẓẓel s snat lmitrat seddaw wakal ɣer
tama n yemma-s i t-yezwaren asmi yeḥbes wul-is akka kan. Ur yebɣi
yara ad d-yerr ɣer lbal-is belli ameqran-is hat-an di Marikan yettnaɣ
d zher-is amek ara d
30
yawi lekwaɣeḍ-is. Aneggaru
ittu-t belli yuɣal am uqjun inecfen seg-asmi i tewwin si tesdawit n Blida ɣer
leskeṛ. Ayen yark yebɣa d tamuɣli-nsen tura ɣer lḥaṛa
amek ttaḍsan am yefrax izedganen zdat wallen n yemmat-nsen tacebḥant.
Yemḥa yark ayen i d-yernan n iɣeblan; Yesfeḍ aḥbas n
lluzin n Lareba akked ustixeṛ seg uxeddim; Yekkes isseggasen n tuǧla
akked laẓ i t-yesbbehdlen zdat warraw-is. Ula d tullas timecṭaḥ
ur asent-ed-yewwi ayen bɣant. Kkrent-ed di lmiziriya, werǧin
ččant ar tawant. Degmi yuɣal yers am tebḍant; Azewax-nni
yella d ilemẓi, yefɣen d amǧahed asmi tizyas mazal ttbibintent
tiyayatinnsen, tewet-it ddunit armi yuɣal yezga uqerruy-is imal ɣer
wakal.
Ddunit tesselmed-as sbeṛ akked
usmecṭeḥ n yiman-is. Tessawḍ-it armi qrib yeqbil akarni n
yemǧuhad, win akken yugi mi iwala acu iwala seg umyezwer s adrim.
Imeddukal-is yuɣalen imir-en d imɣaren ur fhimen ara amek yugi akaṛni
di lawan widak yark werǧin snen acu i d amadaɣ san ikaṛniyen.
Segmi teḥbes lluzin anda ixeddem iṛeq-as anda ara yerr. Yesseḍḥa
ula d anadi n ixeddim nniḍen. Ur yebɣa yara ad yuɣal ɣer
imeddukal-nni, d wumi yennuɣ aṭas imi beddlen lbistat-nsen umbed mi
tewwi tmurt azarug-is.
Yers-ed yisiḍ di targit-is.
Amzun d albaḍ s wefḍis n nḥas i t-yekkaten ɣer tafkert
uqerruy-is. Yebɣa ad yemdel imeẓẓaɣ-is akken ur isel ara
i zaḍ-agi yerwin ul-is. Ixemmem deg ul-is ahat d alejlej n win i wumi
yemmut mmi-s yeḥmel xir n wayen yark ileḥḥun di ddunit. Dina
i d-yetkaki. Ziɣemma yella win i d-yesṭebṭuben di tewwurt s
tidett. Irfeḍ-ed iman-is s lagez n win ur neṭṭis ara sin
wussan. S wallen yeččuṛen d nadam akked ifassen yelleɣwan,
iṛuḥ ad d-yelli tawwurt n wafrag. Yelli-d tawwurt, yebda issefeḍ
s iḍudan imeccaḥen allen-is akken ad iwali anwa i t-id iceṭnen
si tguni-s.
Ixeṛṛa ɣer zdeffir mi
iḥulfa, i txenfuct n tmegḥelt i wumi yettwagzem uteyyut-is, ters-ed
am yir tawkilt ɣef yedmaren-is. Irfed aḍad-is ɣer yimi-s, syin
icuhed. « la ilah ila allah,Muhamed Rasul llah.» Aqcic-nni isan kra ineẓdan
yefruzaen di tamart-is ikkes-as ackil i tmegḥelt-is. Syin yenna yas i
mass Qebbani: « mmet a yadaw n Ṛebbi.» Ijbed di znad, iserreḥ-as.
Acemma ur d-yeffiɣ; tekkeṛ
tarṣast deg ujabub n tmegḥelt. Akken iwala mass Qebbani acu iḍeṛṛun
ifka-yas tiyta n arkel s idmaren i weqcic. Dɣa aken yemmeɣ ad
as-ed-yekkes timegḥelt-is iwala imeddukal-is yellan fren di teɣmert
n wezniq mi la d-ttazalen ɣur-sen. Amcum-nni mazal-it yeṭṭef
di tmegḥelt-is, yugi ad as-iserreḥ. Akken iwala akken, yuɣal
yekcem s axxam-is. Imedel-ed tawwurt–nni n wuzzal s isekṛunen yark yellan
degs. Syin d tazla ɣer wanda tella texxamt n mmi-s. Imi ḥala
taxxamt-nni i yeǧǧa akken ur tt-yessexdem ara i wewaz.
Srid, qbala ɣer umeṭraḥ
n mmi-s. Yeẓẓel seddaw-s, inuda ma yella kra ara yaf. ulac. Syin
yekker-ed, izuɣer-ed ameṭraḥ ɣer yiwet n teɣmert n
texxamt. Imuqel s akaṛlaj ma yella kra ad d-ibanen. Ulac. Dɣa yebda
asṭenṭen s ufus-is ma yella ad d-yerr ukaṛlaj tiɣri.
Amecwaṛ yufa amzun d lɣem
yersen di tegnitt. Yereḍ ad dyessali tablaṭ-nni s yeccaren-is, ur
yezmir ara. Dɣa d tazla ɣer tkuzint ansi i d-yewwi yiwen ujenwi
ameqran yufa di leqjaṛ. Dɣa imir-en isekcem lmus ɣer tkaṛlajin
akken ad d-tali teblaṭ. U dayen yeḍran. Akken i d-tuli cwiṭ,
iawen-itt-id s iḍudan-is yečča lḥif di tniri.
Timegḥelt d taqdimt, tesa sin
ikerṭac zdaxel-is akked d yiwet n tkaṛtunt tamectuḥt ɣer
tama-s ideg-i llant qrad(3) n tkerṭac nniḍen. Iban-ed yefṛeḥ
mi tt-iwala. Irke imir-en ɣef tgucrar-is, anyir ɣef ukaṛlaj iḥemmed
u yettcekkir di Ṛebbi i s-ed icegen widak seg wumi ara d-yerr ttaṛ-is.
Inna ger as d yimanis ma yella yessaweḍ ad ineɣ yiwen seg-sen
yeqbel ad yemmet akken s tasa-s isemḍen.
Imuqel si cqayeq n ṭṭaq
yettaken ɣer lḥara, iwala din azal n
(20) n yergazen i yellan qimen am
widak yettraǧun kra. Issawelasen i widak yefṛez ger-asen.
yenna-yasen:
-acu i tebɣam?
Yerra-yas-ed yiwen seg-sen; -a si
Qebbani, nebɣa ad ken-nẓer yiwet n dqiqa. Awal aḥarfi syin ad
k-neǧǧ.
Yerra-yasen-d: -acu i tebɣam? i
wayen akka i txedmem tura d acu-t ihi? aqli a sellaɣ; init-ed ayen i
ken-yehwan!
Yerra-yas-ed winna: -Nenna-yak lli-d
tawwurt, teffeɣeḍ-ed a nqeṣer. Nesa aṭas n tɣawsiwin
ad ak-tent-nini. Ixemmem ger-as d yiman-is belli yezmer akken ara yesḍil
aqerruy-is si tewwurt ad t-id nɣen. Acu kan s semmus-agi(5) ikerṭac
yesa ur yezmir ara si lebid ad d-yenɣ yiwen seg-sen. Dɣa iddem-ed
isers timegḥelt ɣer tama n tewwurt. Isebded-itt ɣef txenfyac-is
akken ad yizmir ad tt-id-yerfed si zdat n wemnaṛ. Dɣa yenna-yasen i
widak yeqqimen di lḥara: -Cegget-ed ccif-nwen weḥdes ma yella kra
yebɣa ad d-yini, wiyaḍ ad n-grin ɣer zdeffir. Ur ken-umineɣ
ara.
Ḍsan aṭas ilmeẓyen-nni
yellan la ttqesiṛen di lḥara. Yennayasen win i ten-iḥekmen
belli yeshel ad t-id-yejbed ma yella yeffeɣ-ed zdat tewwurt. Dɣa
kkren-d uɣalen ɣer tama n tsemmit n wuzzal n lḥaṛa; Ḥala
ameqran-nsen i d-yuẓan ɣer zdat n tewwurt ansi i d-yeffeɣ mass
Qebbani. Syin yenna-yas-ed bu učamar-nni: -Twalaḍ amek i tḥarceḍ.
Mebla cwal nezmer ad nefru timsal
yenna-yas-ed imir-en mass Qebbani:
-Acu tebɣam tura seg-i. Yakk win i ken-yerḥan dayen tenɣam-t neɣ...
Inṭeq-ed winna s ucmumeḥ
am win yuɣen tannumi ttaggaden-t wiyaḍ: -Ayen nebɣa tezriḍ-ṭ.
Nebɣa kan ad d-tefɣeḍ ɣur-neɣ akken ad d-tessutreḍ
smaḥ ɣef ayen akken i d-tenniḍ tasebḥit-agi di tenṭelt
fell-aɣ. Teẓriḍ aṭas n lɣaci i d-yusan seg aṭas
n tamiwin u anect-a iḍuṛṛaɣ aṭas. Barka-yaɣ
idammen. Mmi-k ad fell-as yafu Ṛebbi d netta i tt-id yewwin i yiman-is.
Ma yelha wul-is Ṛebbi ad t-yawi ɣer ṛṛeḥma-s. Ma
diri-t ur yesi yiwen acu i yezmer ad as-yexdem. Ma d keč, ssuter-ed smaḥ
tura, syin ad tuɣal targa n waman s amḍiq-is amzun acemmek ur yeḍri.
Mass Qebbani
yeǧǧa ṭṭaq ansi yella la s-iheddeṛ, iṛuḥ
yellid tawwurt s laqel. Dɣa akken i tt-id-yelli yark, yeɣlli-d deg
udem n win akken-nni iḥekmen widak yenɣan mmi-s, la s-ed-ittecmumuḥ
s wuglan-is imellalen am udfel yefren di teẓgi n inezḍen iberkanen.
Ul-is yebda la iḥebbek; ur yeẓri ma yella si tagdi ad t-nɣen
neɣ si tcallawt n lǧahd iṛuḥen; yufa-d iman-is ur
33
yezmir acu ara yexdem zdat tejlibt-agi
iwaɣzniwen iɣilen belli d nitni i d imawlan n tidett i d-yefka Ṛebbi
i lɣaci. Dɣa yenna-yas -Amek tenɣam mmi, yerna tebɣam ad
ssusmeɣ. D acu-t wagi ma yella mači d tihudit. Ma tebɣam tameḥqranit
xeṛṣum bɣut-ett inani.
Myesmuqalen deg allen am sin icenga
yettnaɣen si zik. Ifeṭiwjen i d-ṭṭeggiṛent gan am
sin ijenwiyen yettnaɣen deg ubeḥri asemmaḍ. Yiwen d amɣaṛ
kercen wussan iberkanen si tmelɣiɣt, wayeḍ d ilemẓi, d
aterras akken yebda amured ɣef tlufa n ddunit. Amecṭuḥ icuba
ameqran asmi yella anect-is; ameqran icuba acu yezmer ad yuɣal umecṭuḥ.
Mlalen deg yiwet n tegnitt sin yexfawen n wemrar deg i yal yiwen yezzuɣur ɣer
yidis-is armi qrib ad yeqqerṣ. Ulac tifrat. D awezɣi umsefhem
ger-asen. Ɣur-sen kan ḥala ad myezmaḍen am lmut akked tlalit.
Wanect-a fehment di sin.
Issufeɣ-ed imir-en bu
tčamart tameẓyant si lǧib-is, isers-as-tt ɣef yedmaren i
mass Qebbani. S ufus nniḍen iṛuḥ ad t-id-yejbed si lkum n
lbista-s akken at yawi s imeddukal-is. Dɣa iwexeṛ mass Qebbani ɣer
yiwen yidis u yerra s lemɣawla afus ucengu-ines seddaw teɣṛut-is.
Syin yefka-yas tiyta s tkaburt ufus-is s anzaren.Din,yeɣli bu učamaṛ
ɣer deffir. Akken iwala akken-nni issufeɣ-ed abaṛ si tmeẓyant-is
di lewhi n mass Qebbani i d-irefden imir-en timegḥelt-is yellan ihegga-tt
zdeffir tewwurt. Iwhem yilemẓi-nni mi iwala tarṣaṣt-is ur t-tḥuza
yara, akk daɣen mi t-iwala s tmegḥelt. Ur yeḍmi ara ula d
yiwen webrid belli yesa-tt. Tixnefyac ɣef yedmaren-is, ijbed znad qrib s
lfaṛḥ. Yeṛeqraq weqcic ɣef urur-is am teslent yerkan.
Uzlen-d imir-en imeddukal-is yellan ɣer
tsemmit n lḥara, u meqbel ad d-refden tiklacin-nsen yufa-d lḥal
yekcem mass Qebbani s axxam. Isekkeṛ-ed tawwurt makken yebda ubruri n rṣas
ɣef tewwurt-nni n wuzzal. Akken iwala akken yeḥnunef ɣef ukaṛlaj
am ijirmeḍ. Ihegga timegḥelt-is qbala ɣer tewwurt akken ma
yella win i d-ikecmen ad as-yefk s idmaren ikerṭac i s-ed-yegran.
Amecwaṛ,
yexsi zhir-nni n rṣas. Ixdem mass Qebbani afud i yiman-is, ɣas akken
qerḥent tgucrar-is mi yeɣḍel iman-is ɣer lqaa. Yuẓa
ɣer ṭṭaq. U seg yiwen n yidis ibda amuqel ɣer baṛṛa.
34
Imṛeq imir-en yiwen seg-sen
issened s iɣallen-is ɣef yiwen uqenfud n wakal, aḥric ameqran
seg uzagur-is iban-ed yark. Dɣa yessufeɣ-ed mass Qebbani si cqayeq
taxenfuct n tmegḥelt, iwehha-tt metwal s arur-nni. Iqmeḍ nnefs-is,
imdel tiṭ-is tazelmaṭ, ijbed di znad ɣer deffir syin iserreḥ-as.
Yesla-yas i winna mi yemmeṛmeɣ
di baṛṛa. Ur ẓran ara imeddukal-is acu yeḍran yides. Daɣen
ur ṛǧin ara akka ara sentuqqel tmeddit-nsen. Ahat mi slan s wacu i
d-yenna mass Qebbani fell-asen di tenṭelt, nnan-as belli ilaq-asen ad
gezmen azaṛ isseḍwayen di taddart-agi meqbel ad d-nulfun wiyaḍ
am wagi akka i d-mlalen.
Fran-tt deg allaɣen-nsen belli
ayen i d as-yehwan yeḍru ur ilaq ara ad ṛuḥen s yinna mqbel
ad d-awin lqeḍ n mass Qebbani yefren tura deg uxxam-is.
Yuɣal imir-en rṣas i d-iɣellin
ɣef uxxam am ubruri. Leḥyuḍ yark ṭṭuṭcen, asɣar
n ṭṭwiqan yefla yark. Yeḥnunef mass Qebbani armi d talemmast
uḥanu akken ad yerwel i rṣas i d-ikečmen tikwal si llajuṛ
yeflan. Ixemmem ad yarǧu sima ḥebsen aseglef-agi-nsen akken ad yuɣal
ɣer ṭṭaq-is ansi ara yereḍ ad d-isseggeḍ yiwen nniḍen.
Ticki yebda ineqqes ṣṣut-nni uḥlalas iselben. Yekker-ed mass
Qebbani ɣef tigucrar-is akken ad yecrured ɣer wemḍiq-nni, ɣer
tama n ṭṭaq dɣa iḥulfa am usennan yentan deg ubbuḍ-is.
Ikker isuma-t, yufa-t yetteḥnucuḍ u yeḥma. Yeḍsa mi
ifaq belli ḥuzan-t-id warraw n leḥram-nni yellan di baṛṛa,
issekcem aḍad-is deg uṭiṭuc i d-teǧǧa tarṣast
deg ueddis-is, syin icuhed am win yeẓran belli tudert-is ad tleḥḥu
ad tessiweḍ ass-is aneggaru di ddunit-agi. Yerna yeḍsa imi si yiwet
n tama yugad acu i t-yettraǧun umbed lmut, u si tama nniḍen iḥar
ad iẓer acu yellan. Yernu ur yezmir acu ara yexdem umbed ayen akka iḍerrun.
Tuɣal tudert-is teffeɣ seg ufus-is. Acu kan iḥulfa i usismeḍ
n tasa-s, ladɣa makka i d-yerna iṣṣegged-ed wis sin-nni.
Iban ḥṛuṛan
widak yellan di baṛṛa, imi kra seg-sen wwḍen-d armi d yiwen n
lḥiḍ n wexxam anda bdan ahuddu deg-s s yiwen n ddakum. Dɣa
akken yesla mass Qebbani i uṭenṭen n wuzzal di llajuṛ, iɣawel
ɣer ṭṭaq yellan di tama n lḥiḍ-nni. Syin imuqel si
cqayeq, iwala azal n qrad(3) seg-sen ṭṭfen yiwet n tdebbuzt n
35
wuzzal, kkaten yess lḥiḍ.
Yelli-d imir-en cwiṭ ṭṭaq ansi i d-yessufeɣ tixenfyac n
tmegḥelt n mmi-s. Syin issereḥ-as i sin lewǧuh. S yiwen iḥuza
yiwen seg irebraben s aḍaṛ, ma yella d wayeḍ iwet deg yiwet n
sebbalt n waman, imi yufa-ten-id lḥal rewlen mi yeffeɣ webaṛ.
Yezmumeg mass Qebbani mi d-yeddem
takarṭuct taneggarut, yerra-tt ɣer zdaxel n tmegḥelt. Yerna
yezmumeg mi inuda s uḍad-is aṭiṭuc-nni i d-teǧǧa
tarṣast yeflan aebbuḍ-is. Issekcem-it am akken ara t-yessekcem deg
anzaren-is. Iḥulfa i yidammen mi d-tt-feggiḍen seg-s am tbezziṭ
n waman tamectuḥt. Ɣas mači aṭas i d-itefɣen idammen
si telliṭ-is, aqerruy-is yebda la yettṛuḥu sya ɣer da.
Tuɣal tmeddurt-is d taḥlawant di targit n wallen ibṛaṛḥen,
ideg-i yezzer tura. Kullec iban-as-ed am aman izedganen. Imir-en, ɣur-es
acemma ur yeswi. Kullec di ddunit ad d-ilal ass-a akken ad yemmet azekka. Ass-a
netta iga am uqerquc di tenqeltt umbed mi yeqqel d iniɣem; abeḥri
amectuḥ ad t-id-yesseɣḍel seg ixef anda isedda tudert-is maṛṛa.
Yelli-d allen-is iwala lexyal n
Ɛumaṛ, ameddakel n mmi-s. Yella am akken ad as-yettcudu yiwen ubeḥnuq
amellal i lǧarḥ-nni yellan deg uebbuḍ-is. Iḥulfa i wezmaḍ
i s-iqarḥen izeṛman-is dɣa yenna-yas: -a Ɛumaṛ,
ttxilek ini-yi-d, keč tura nessaḥ neɣ d lexyal kan i
k-id-ttxyaleɣ deg allaɣ-iw. Axaṭer tqerḥeḍ-iyi
aebbuḍ-iw.
Yerra-yas-ed win akken i s-ed-ibanen d
lexyal: -mači d targit i tettarguḍ. D nek i d Ɛumaṛ s
yiman-is. Mi yesliɣ acu iḍeṛṛun yid-ek ussiɣ-ed ad
ak-fkeɣ afus. Yernu wwiɣ-ak-ed takaṛṭunt ikerṭucen
yeǧǧa ɣur-i Ḥamid meqbel ad yemmet.
Yerra-yas-ed imir-en mass Qebbani i
wumi qemcent wallen: -Teẓriḍ, yiwen seg-sen wwiɣ-ed lqeḍ-is,
sin aḥazi ḥuzaɣ-ten acu kan ur zmireɣ ad d-iniɣ ma
yella mmuten, neɣ ala. I keč amek i d-kecmeḍ? Ahat wallan-k-id.
Yehwa-yak kan tefkiḍ-ed aqerruy-ik ɣer lfinga. Nek dayen waqila
ass-a ara ken-ǧǧeɣ.
Yenna-yas-ed
imir-en Ɛumeṛ: -Sbeṛ kan cwiṭ, qrib ad d-yali wass.
Nitni uɣen tannumi deg uzal xemten am cmayet. Tura a ṛuḥen.
Sbeṛ kan cwiṭ. Ma d anekcum-iw, kecmeɣ-ed si ṛṛef
n wexxam anda yexdem Ḥamid
36
tiseddaṛin. Negzeɣ-ed seg
uxxam n lǧiran-nwen. Yufa-yi-d lḥal siɣ tasarut n tewwurt n
wuzzal i d-yettawin si sqef.
Yessusem cwiṭ, syin ikemmel
awal-is: -Taddart kamel ur tt-yeǧib ara lḥal. Ayen akka iḍerrun
iedda lmuḥal. Bɣiɣ ad ak-ed-iniɣ yiwen wawal, acu kan
mači dayen walaɣ s yiman-iw…
Yenna-yas-ed mass Qebbani deg wumi i
d-iban eggu n win i wumi yuzlen aṭas idammen: -Ini-d ammi, acu tebɣiḍ
ad meyzeɣ di dqayeq-iw tineggura; Ɣas ini-d ur clieɣ ara.
Yenna-yas: -Nnan-ed kra,ɣas nek
ur walaɣ s yiman-iw, belli limam-nneɣ nɣan-t iḍelli umbed
taẓallit n lica. Nnan-as belli d netta i d ak-ed-yefkan ismawen-nsen.
Anect-a dayen i wumi sliɣ di tezniqt-nneɣ. Nek iqiḥ ur walaɣ
s yiman-iw… Dɣa nniɣ-as ger-i d yimaniw belli lmut yiwet. Nniɣ-as
ɣas ur mmuteɣ ara nek d Ḥamid seld iḍelli, ihi ass-a ad
mteɣ d baba-s ma yebɣa Ṛebbi. Yernu ar melmi ara regleɣ
fell-asen?
Dɣa ikker imir-en yeḥnunef
s umured armi d yiwet n texxamt akken ad d-yawi yiwet n tduli. Iṣubb
aqerruy-is, imi tikwal akka tetteddi-d terṣaṣt ɣer zdaxel n
wexxam. Mi iṛuḥ ad as-ed-yekkes timegḥelt i wemɣar
yufa-t yeckenṭeḍ deg-s s wayen yark i s-ed-yeqqimen n tezmert.
Yessaki-t-id si tnafa-nni deg-i yezzer akken ad as-tt-id-yefk. Syin iddem-ed
ikmes-it di tduli i d-yewwi si texxamt, imi yebda wemɣar ad t-tkečem
tawla n tesmeḍ.
Iemeṛ Ɛumaṛ timegḥelt
s sin ikarṭac. Dɣa yuẓa ɣer tama n ṭṭaq seg
ansi i tt-iwehha ar widak d-ikaten s rṣas s axxam. Iqqim ɣef
tgucrar, iḍaren-is la ttargigin am snat tɣunam. Syin irfed znad iṣerreḥ-as.
Seg makken ur yuɣ ara tannumi, tejbed-it tmegḥelt s igenni anda yeṭṭarḍeq
webaṛ deg iri n ṭṭaq i wumi yessufeg yiwet n teɣmeṛt.
Si texxamt ɣer
tayeḍ, si ṭṭaq ɣer wayeḍ yettazal s waḥnunef
di lqaa weqcic yettun belli qrib yemmut sin wussan meqbel. Iččuṛ
leǧyub userwal-is akked d ubalṭu-ines d ikeṛṭac s wacu
yekkat ɣer baṛṛa. Ɣas ulamma ula d yiwen ubrid ur iḥuza
yiwen si irebraben-nni i d-izzin i wexxam acu kan ur asen-yeǧǧa yara
37
ad d-aẓen ɣur-es ula d
yiwen n yiɣil. Ikkes-asen taẓana. Netta i t-yettawin i t-yettaran si
sqef n wexxam ɣer texxamin n wadda. Ayen yark yeḥṛarten ad yeḥriret
yides. Tuɣal-as timegḥelt s wacu yekkat amzun d afus-is-nniḍen.
Ikcem-it ḥamu-nni akked tiselbi-nni n win yeẓran iman-is yezmer ad
yemmet ger dqiqa d tayeḍ. Dɣa yebda yettčihid mebla aḥbas
armi yuɣal yenṭeḍ u yeddukel deg imi-s ucihed akked nnefs
yettnefis.
Seg umecwaṛ ɣer wayeḍ
yettuɣal-ed ɣer tlemmast uḥanu anda yeẓẓel mass
Qebbani, yettami-yas tamgarṭ-is, yettmuqul ma yella yewweḍ lafu n Ṛebbi
neɣ mazal. Yal tikelt yettaf-it-in yuɣal d awṛaɣ ugar n
wayen yella meqbel. Dɣa din ad icihed fellas akken yezmer ad icihed ɣef
yiwen yemmuten. Iẓra ger-as d yiman-is d awezɣi, u d lmuḥal ad
fɣen seg uxxam skud mazal arrac-nni umadaɣ tezzin i wexxam. U nitni
mači d widak ara iqeblen ad ttuɣelben s wemɣaṛ acaraf neɣ
s weqcic ungif am netta. Ula d nitni ad bɣun ad d-rren ttaṛ. Akka i
teddunt temsal.
Imuqel Ɛumeṛ ɣer tkarṭunt
n tkaṛṭac i d-yufa lḥal ur yewwiḍ ara wezgen i d-yegran
deg-s dɣa yemṛareɣ ɣef ukaṛlaj akken ad yestefu si
eggu n tmegḥelt ẓẓayen aṭas fell-as. Tafekka-ines tuɣal
tedduz si tesmeḍ akked tagdi n lmut. Iḥulfa daɣen i tagdi n
widak yellan di baṛṛa. Syin s umured yewweḍ ɣer wemɣar
yeẓlen am ujebbad di tlemmast uḥanu di tferṣadit. Mi yewweḍ
ɣur-es, isers-as daɣen aḍad-is ɣef uzar ameqran n temgarṭ
akken ad iẓer ma yella mazal-it yedder.
D tafrara, tebda tafat la d-tneqqeṛ
ɣef taddart n sidi Ɛetman, yekker Ɛumeṛ seg yidi-s n mass
Qebbani anda yella yeẓẓel i westefu, qbala ɣer sqef seg anda
ara d-iass akken ilaq tikli irebraben. Yugad ad d-zeḍmen umbed mara walin
yewweḍ-ed lefjer meqbel ad awḍen s ayen bɣan. Dɣa s tmegḥelt
ɣef uzagur am isura iwala di tilibizyu, inṭew d asawen, ɣer
sqef n wexxam.
Akken kan yewweḍ yebda asufeɣ
n lewǧah ar yal tama anda llan irebraben. Inna-yas akka ad ẓren
belli mazal-aɣ d irgazen u ma bɣan ad d-aɣ-nɣen ilaq ad
fken kra seg-sen d asfel. Syin ikemmel Ɛumeṛ tiyta, armi iḥulfa
i weẓɣal i d-yulin seg uzzal n tmegḥelt.
Ticki iwala abeḥnuq
neɣ ahat d tamecwaṛt tamellalt i dyettwarefden deg igenni. Iwhem d
acu-tt. Ur yumin ara iman-is
38
mi iwala limam n taddart ad d-ileḥḥu
srid s axxam; deffir-es cwiṭ, yedda-d gma-s n mass Qebbani. Dɣa
yuzzel-ed si sqef ɣer tewwurt, yelli-yasen-d. Nutni qbala d tazla ɣer
wemɣar-nni yeẓlen di tlemmast n wexxam. Ufan-t-in yettwakmes am
ubelluḍ zdaxel n tduliyin n yizem yellexsen yark d idammen. Ḥala
taqadumt-is tawraɣt i d-yettbanen seg-s. Ula d claɣem-is amzun
ikcem-iten ccib. Ayen yeswehmen limam akked gma-s, dakken ufan-t-in mazal-it la
d-yettara nnefs amzun d taguni i yeṭṭes. Dɣa akken walan
anect-en ṭfen-tt d tazla ɣer ufergut n yiwen uqcic n taddart. Amecwaṛ
kan iḥbes-ed zdat tewwurt n wexxam yeṭṭuṭcen yeflan am
tseksutt. D abrid ar ttbiṭaṛ n Blida.
Iqqim limam ɣer tama n Ɛumeṛ,
la s-issefeḍ tidi uɣebbar yeqquren ɣef unyir-is. Ismekta-yas-ed
belli ass-agi mači di lǧama iẓẓullen lefjer. Dɣa yeṭṭerḍeq
weqcic d taḍsa, yenna-yas-ed: -Ǧaleɣ nɣan-k warraw n leḥram.
Nnan-iyi-d belli s axxam i n-zeḍmen. Yerra-yas-ed limam s ucmumeḥ:
-Nwala-k-id seg uxxam n si Faṛuq amek isen-txedmeḍ iḍ-agi.
Teskufareḍ-ten. Nebɣa ad d-nass ɣurwen wten-aɣ-ed s uḥlalas.
dɣa nuɣal. Lemmer ad tezreḍ acḥal ḥdaqren
fell-awen. Dɣa keč, uɣalen amzun ččan ṛṛaǧ
seg-k. Ulac amek ur xdimen ara akken ad k-id-awḍen, ur zmiren ara …ma d
nek nniɣ-asen mi d-ṛuḥen ɣur-i belli ayen i d-yenna si
Qebbani d ayen i t-yenan netta, ur ttkaɣ ara deg-s. Ẓriɣ
imir-en mazal i d-tewweḍ deg allaɣ-nsen tegnitt anida nɣen
limamat am nek. Dɣa unfen-iyi. Ddiɣ-ed deffir-nsen ad asen-sfehmeɣ
belli ayen i d-yenna fell-asen mači d ajqeṛṛi-nsen, acu kan d
tiɣri kan n wemɣar i wumi yemmut mmi-s s yiwet n lmut tucmitt.
Di lawan-nni i s-ed-yettmeslay limam,
isers weqcic taqerruct-is ɣef tayett-is. Dɣa yeɣli yeṭṭes.
Aneggaru-yagi ur asifaq ara armi d makken i d-yeɣli ɣer irebbi-s.
Yebɣa ad d-iru seg ayen akka yeḍran d weqcic-agi: nɣan-as
ameddakel-is zdat-es, akken sin wussan umbed uɣallen-d ad t-nɣen
netta. U yewwas seg ussan-agi i d-iteddun, mebla ccek, ad uɣalen tikelt
nniḍen ɣur-es. Dayen tura ɣur-sen yettwaḥseb am win
yemmuten.
Yeqqim akken, s weqcic yeẓlen ɣef
taɣma-s, ur la yetteḥṛirit ara, yiwen akken umecwaṛ meqqṛen;
Ur yebɣa yara ad t-id-yessaki. Imi laca iwala-t-id amek isen-d-yeṭṭef
i yelmeẓyen-nni i d-yezzin i wexxam n mass Qebbani. Ɣas ula d yiwen
ubrid ur iḥuza albaḍ seg-sen, acu kan yesseṛwa-yasen timeṛzuga.
Imi mkul mara d-iqarreb yiwen seg-sen yeṭṭaweḍ-it-id webaṛ
ar tama-s. Qlalḥen fell-as ajel uqlileḥ. U ɣef ayagi, yeẓra
ḥala tuɣalin ara d-uɣallen yewwas ɣur-es, ass-a neɣ
azekka , neɣ ass nniḍen.
Imekta-d imir-en belli d lawan ad
sahlen, dɣa yessaki-it-d si tnafa-s. Yenna-yas: -Tezriḍ, d lawan, ad
tṛuḥeḍ ɣer Blida. Ass-agi ad tegneḍ din ɣer
mmi-s n xali. Azekka ad iḍul webrid-ik, imi ad k-ceggeɣ ɣer
yiwen umeddakel-iw di Wehṛen, yesa lkuca n weɣrum; Mači aṭas
ayagi i yi-d-inna yeḥwaǧ axeddam. Din ad txedmeḍ ɣur-es.
Ɣur-ek anda i d-tettuɣaleḍ. Beddel isem i yiman-ik, ur qqar i
yiwen ansi i d-tusiḍ. Ma tejmeḍ yewwas imawlan-ik ini-yasen-d, d
nitni ara n-iṛuḥen ɣur-ek. Neɣ akka, ur tettu yara !
Yenna-yas imir-en Ɛumeṛ :
-i si Qebbani amek i teḍṛa yides. neɣ, ur yemmut-ara?
Yerra-yas-ed limam: -Mass Qebbani,
hatan di ttbiṭaṛ. Ma yella yura-yas Ṛebbi ad yemmet ass-a,
ihi si lmut-is ulac anwa ara t-id-yessuksen. U ma yella yura-s Ṛebbi ad
yernu cwiṭ di ddunit, anect-a dayen i yelhan i werraw-is d leḥbab-is.
Ladɣa snat tmectaḥ-nni. Yyaɣ tura d lawan a nsahel.
Kkren-d di sin seg umnaṛ n
wexxam anda qqimen. S laqel ṭṭfen abrid ar temraḥt iṭaksiyen
yettawin ɣer Lareba. Mi wwḍen ɣer tsemmit n lḥara imuqel-ed
Ɛumeṛ ɣer wexxam-nni n at Qebbani, iḥulfa imir-en mi
iwala anect-en n tebrikt yeftutsen, belli dayen ur yettuɣal ara yark ad
d-yuɣal ɣer taddart-agi-nsen. Dɣa yecmumeḥ.
.
Ait-Qasi
Md-Arab
(aḥric2)
Numéro 60 Novembre 2012
H. Genevoix, l’
habitation kabyle, FDB, Fort-National, 1962
Dans son roman, "Le fils du pauvre", le regretté Mouloud Feraoun découvrait à ses lecteurs étonnés un monde jusqu'alors mal connu, Dans un style plus riche de précision et de sincérité que d’habiletés, il décrivait la vie d'un village kabyle : travail austère et peu rémunérateur sur un sol ingrat, cohésion des familles entre elles, gestes d'entraide authentique en même temps que rivalités, aussi tenaces que peu motivées parfois.
Voici la description qu'il donnait de l'habitation d'un gros propriétaire kabyle. Cette description vaut, en beaucoup de points, peur la demeure des pauvres, soit la majorité des habitations.
"L'habitation du gros propriétaire peut avoir deux pièces en vis-à-vis, (qui font douze coudées de large sur quatorze de long), une ou deux petites chambres pour le fils aîné ou l'étranger de passage. Toutes les bâtisses sont construites en blocs de schiste liés avec du mortier d'argile. La toiture est en tuiles creuses reposant sur un lit de roseaax. Le parquet
