|
Ayamun cyber-tasàunt n tsekla n Tmaziàt ayamun cyber-revue
de littérature berbère Numéro
14 Septembre 2002
35 pages |
Retour au titre
Sommaire:
1°)_Le texte en
prose: Win yenwan yuḍen
traduction
de Md Ait-Ighil 2°)_La conférence:
Asif
ur aɣ-iteţţ ara
par Ɛ.Mezdad 3°)_Le poème: Ɣileà d asif sɣur Ɛ.Mezdad 4°)_Adresse de messagerie électronique |
Retour
en haut
Numéro 14 Septembre
2002
WIN
YENWAN YUḌEN
sɣur Md Ait-Ighil Le malade imaginaire
de Molière
IXF I Assayes
w5 Ad tekcem Tliǧa, taqeddact n wexxam, ur tgi aṭas
n ccan i umuḍin, win tesefqaɛ tikkwal. Atta tejba-d Tiziri, tettmeslay i
Tliǧa ɣef tayri tesɛa ɣer Cacnaq. AGGUR (baba-s n Tiziri, yaẓ ɣer ukursi yeqqim)
_ Gliɣ-d s yiwen n lexbar isefraḥ nezzeh, ulad kem ur tettamneḍ ara yess. ḍelben-iyi-d afus-im. Amek akka, tettaḍsaḍ ?
Ɛni d tidett, awal wercal iman-is isefraḥ ; ilemẓiyen
d tirni ferḥen s wawal-a. iiih ! A ddunit, a ddunit ! Akken fehmeɣ lumur a tameɛzuzt-iw, ugaɣ
tqebleḍ, fiḥel ma sutreɣ rray-im. TIZIRI
_ Ayen tebɣiḍ a baba, nekk qebleɣ-t. AGGUR
_ Ferḥeɣ aṭas mi sɛiɣ taqcict tettaɣ rray. Ihi, dayen tefra, ula d nekk weɛdeɣ-kem. TIZIRI _ Ayen tebɣuḍ tumreḍ-it-id, ad yi-d-tafeḍ
zwareɣ ɣer weqdac. AGGUR _ Nana-m, tameṭṭut-iw, d tmaɛzuzt-nni,
uletma-m, ugint-am zzwaǧ-a. TLIǦA _ Anagar tin yettewten i yeẓran iwimi. AGGUR _ Nemqellaɛ s wawal, nutenti mmeslayent-d
nekk kifkif, ɣer taggara d nekk i yesɛan lḥeq. TIZIRI _ Ah ! A
baba, ugdeɣ ur zemmreɣ ad k-rreɣ deg lxir. TLIǦA (i Aggur) _ D tidett, s zzwaǧ-a tgiḍ-d ccɣel yelhaa deg ddunit-ik. AGGUR _ Amdan-a mazal ur t-ẓriɣ maca nnan-d ad ɣ-yejeb
i sin yid-neɣ. TIZIRI _ D tidett a baba, nekk yeɛjeb-iyi wergaz-a. AGGUR _ Amek, weh teẓriḍ argaz-a ? TIZIRI _ Azal n setta n wussan akka, nemlal nekk d
wergaz-a ɣer wemnar n tḥanutt, nemmeslay din din nemmijab nemmiḥmal nemyuqqan
imal. Teggra-d kan deg yimawlan, mi tqeblem dayen. AGGUR _ Mačči akka i yi-d-sfehmen. Tuqeɛ-aɣ, awi-d
kan mi d-nemmezg. Qqaren-d argaz-a yelha. TIZIRI _ D tidett a baba. AGGUR _ ezzif ? TIZIRI _ Ulac ccekk. AGGUR _ Igerrez. TIZIRI _ Ih, a baba. AGGUR _ Tafekka-s tebha. TIZIRI _ ebha a baba. AGGUR _Yettɛeqqel, d mmi-s n wergaz d tmeṭṭut. TIZIRI _ Ih. AGGUR _ D aḥeqqi. TIZIRI _ Ulac wis-sin am netta di ddunit. AGGUR _ Yeɣra. TIZIRI _ Anect-a mazal ur ẓriɣ ara. AGGUR
_ Ad d-yeffeɣ d ṭṭbib. TIZIRI
_ Netta ? AGGUR
_Netta ih. Ur m-yenna ara ? TIZIRI _ Ala, ur yi-d-yenna ara. I kečč anwa i k-d-yennan ? AGGUR _ D Brahim. TIZIRI _ Dda Brahim yessen-it ? AGGUR _ Wama ! Ihih,
amek ur yettisin ara ayaw-is. TIZIRI _ Cacnaq, d ayaw n Dda Brahim ? AGGUR _Anwa Cacnaq kem daɣen ?
Nettmeslay ɣef win iɣer neqqen imal-inem. TIZIRI _ Ah ! Aḥeqqa d
tidett. AGGUR _ Ihi, akken i d-nniɣ, d ayaw n Brahim, d
mmi-s n ṭṭbib Ǧaɛfar ; argaz-a isem-is Ṭaher,
mačči Cacnaq. Nemlal ssbeḥ-a, negzem ɣef zzwaǧ gar-awen. Brahim d Ǧaɛfar, ad
ddaklen azekka d uḍeggal-a, ad rzun axxam-iw azekka. Acu kem-yuɣen, twehmeḍ ? TIZIRI _ Bateɣ acku kečč tettmeslayeḍ ɣef yiwen,
nekk ttmeslayeɣ-ak-d ɣef wemdan nniḍen. TLIǦA _ Acu ! Amek
akka, ay amɛallam i d-tgiḍ asfel am wa i yelli-k ? Ayen akkit tkesbeḍ ur tesqenɛeḍ ara armi terniḍ
aḍeggal d ṭṭbib fiḥel ma tcawreḍ yelli-k. AGGUR _ Ihih ! Anwa i
m-yefkan awal ? TLIǦA _ D Rrebbi iman-is i yi-yefkan awal ! Dayen yekfa rray iqewmen. Acuɣer ara nemsiweḍ ɣer
yir awal ? Ini-d amek tefriḍ taluft iman-ik ? AGGUR _ Tebɣiḍ ad am-d-iniɣ acuɣer xtareɣ argaz i yelli
d ṭṭbib, acku nekk uḍneɣ ; d aneɛkuf, laqen-iyi aṭas n yimeddukal d uḍeggal, d ṭebbat, d nutni kan ara
d-yettwilhen i liḥala-w. TLIǦA _ Ata tura ! Limer akka dili d kečč i inudan
ad tzewǧeḍ d teṭbibt, mačči d yelli-k ara tefkeḍ nnig n lebɣi-s i ṭṭbib. Yerna, anwa i k-yennan tuḍneḍ ? AGGUR _ Amek i d-tenniḍ a tamcumt ?
Ma uḍneɣ ?
Ur tettseḍḥiḍ ara. TLIǦA _ Iwimi tfeqɛeḍ ay amɛallem, tebɣiḍ ad ak-d-iniɣ
tuḍneḍ ? Ihi tuḍneḍ. Ih, tuḍneḍ nezzeh, ula d
nekk tura, umneɣ. Akka tefra. Ad nuɣal ɣer yelli-k :
Nettat ur tuḍin ara, ilaq-as argaz teḥmel mačči d ṭṭbib i tuḥwaǧ. AGGUR _ Mačči akka i ilaq ad tfehmeḍ, ḥesses : Argaz i nettat, ṭṭbib i nekk, akka ad nefreḥ
am nekk am nettat. TLIǦA _ Ur ẓriɣ ma zemreɣ ad d-rnuɣ awal. AGGUR _ Deg zgelli kem tettmeslayeḍ, acuɣer ara tḥebseḍ
tura. TLIǦA _ Riɣ limer zzwaǧ-a
ur d-yettili. AGGUR _ Iwimi ? TLIǦA _ Acku yelli-k ur tqebbel ad d-yili. AGGUR _ Ur tqebbel ara ? TLIǦA _ Ur tqebbel ara. AGGUR _ Yelli ? TLIǦA _Yelli-k, ih. Ad tagi Dda Ǧaɛfar, d mmi-s d
Dda Brahim. AGGUR _ Amek, ur tqebbel ad tezweǧ d wergaz-a ? Anaɣ ur t-ius wayra, ula d lurata-s meqqret : Nnig n lurata ara s-d-yeǧǧ baba-s terna-d
tin n xali-s ; yettaɣ apansyu. TLIǦA
_ Ma yesɛa apansyu meqqer, ihi yenɣa aṭas n medden di lgirra ? AGGUR _ Ih, apansyu n xali-s fiḥel ayen ara d-yeǧǧ
Ǧaɛfar, baba-s. TLIǦA _Ayen akkit tessarmeḍ i yelli-k yelha. Maca
wissen ma tesliḍ-d i wayen i d-nniɣ. Qqareɣ-ak, Tiziri ur telli d tameṭṭut
yuklal wergaz-a. AGGUR _ Nekk nniɣ-d akka, “ Akka”. TLIǦA _ Ala ! Ur ilaq
ad tiniḍ “akka”. AGGUR _ Acuɣer ur d-qqareɣ ara “akka” ? TLIǦA _ Zun mačči d kečč i yettxemmimen ɣef wayen i
d-teqqareḍ. AGGUR
_ Ayen yebɣu yini-t yiwen, tura dayen. Nekk, fkiɣ awal nettat ad teḍfer deffir-s. TLIǦA _ Ur tqebbel ara. AGGUR _ Ma tewweḍ taluft ɣer tugin, ad ḥettmeɣ
fell-as. TLIǦA _ Nniɣ-ak ur tt-id-teserḍabeḍ ara. AGGUR _ Ad teqbel neɣ ad aɣeɣ rray i yi-d-tefka
Nanna-ss d uletma-s tameɛzuzt. TLIǦA _ Ad tawḍeḍ ɣer lecɣal-a ? AGGUR _ Ih, ad xedmeɣ ayen i d-nnant. TLIǦA _ Akka ! AGGUR _ Amek, akka ? TLIǦA _ Aya, ur yettili. AGGUR _ Ad tɛawjeḍ. zun yella kra deg ufus-im. TLIǦA _ Ur yettili ara. AGGUR
_ Ur yettili ara, xaṭi ? TLIǦA
_ Xaṭi ! AGGUR
_ Ihi, ur ttaɣeɣ ara rray n Nanna-s d uletma-s tameɛzuzt, ma bɣiɣ ? TLIǦA _ Nniɣ-ak ur txeddmeḍ ara ayen i k-d-nnant. AGGUR _ Anwa ara yi-d-yezgen deg webrid ? TLIǦA _ Kečč yakan. AGGUR _ Nekk ? TLIǦA _ Ur k-yettakk ara wul-ik ad txedmeḍ anect-a. AGGUR _ D ul-iw kan i d aɣilif, ad ɛefseɣ fell-as. TLIǦA _ Tesqecmiɛeḍ. AGGUR _ D tidett i d-qqareɣ. TLIǦA _ Ad tezwir ɣer wul-ik lḥenna n yimawlan. AGGUR _ ad tt-sefḍeɣ. TLIǦA _ Ad k-d-tger iɣallen, tiṭ tegelmem s yimeṭṭi.
Din din ad tefsiḍ ad tuɣaleḍ d lqaɛa AGGUR _ Ayen yebɣun yili ur ttbeddileɣ ara. TLIǦA _ Ih, ih. AGGUR _ Ur d-ttmeslay ara akka. TLIǦA _ Uh a Rrebbi ! Anaɣ ssneɣ-k ; ḥnin wul-ik. AGGUR (yefqeɛ)
_ Ul-iw yeqqur am wedɣaɣ, ula d nekk feqqɛeɣ mi ara
bɣuɣ. TLIǦA _ Kra kra, ay amɛallem. Anaɣ meqqar ur
tettxemmimeḍ ara tuḍneḍ. AGGUR _ Ilaq ad tawi lexbar. Ilaq ad theyyi iman-is
ad tezweǧ d wergaz i s-d-heyyaɣ. TLIǦA _ Ma teqbel, nekk ad tt-swilheɣ ad tagi. AGGUR _ Anda-yaɣ ? Ata lweqt ideg i d-neggra ! Taqeddact tettnaqab amɛallem. TLIǦA _ Rray yelhan yezmer ad yekk seg tqeddact ma
yeɛreq i wemɛallem. AGGUR (yettazzal
deffir n Tliǧa) _ Ah ! A tucmit, limer ad
kem-id-ṭṭfen ifassen, ad twalaḍ. TLIǦA (terwel)
_ Ur zmireɣ ad ttwaliɣ deg kra iɛuj, ad t-ǧǧeɣ akken. AGGUR (yeddem-d
aɛekkaz, yeṭṭafar-itt) _ Arwaḥ, arwaḥ, ad m-slemdeɣ ad temmeslayeḍ. TLIǦA _ Aql-i lethaɣ-d yid-k akken ad ttwilheḍ i
wayen txeddmeḍ. AGGUR _ A taqziḥt ! TLIǦA _ Akken i k-yehwa siwel-iyi-d. nekk, ur qebbleɣ ad yili zzwaǧ-a. AGGUR _ A tin ur nemɛin ! TLIǦA _ Ad taɣ rray i nekk, wala i kečč. AGGUR _ Tiziri ! Ur
tezmireḍ ara ad as-tiniḍ ad tessusem ? TIZIRI _ Ur sehlak iman-ik a baba. AGGUR _ Limer ur d-tḥebbseḍ ara, ad kem-suffɣeɣ ɣer
cumaj, ad tuɣaleḍ ɣer telkin-im. TLIǦA _ Ula d nekk ad tt-nekkreɣ ma tezweǧ d
wergaz-a. AGGUR (yebra i
yiman-is ɣef ukursi) _ Ah ! Ah ! Dayen ur zmireɣ ; tesehlek-iyi. |
Numéro 14 Septembre
2002
Asif
ur aɣ-iteţţ ara Ɣer imusnawen-nneɣ,
ma yella win yebɣan ad d-yebder wayeḍ deg wayen yelhan, sin neɣ 3 wawalen zgan ţţuɣalen-d, uɣalen amzun d
inhisen (proverbes) : iles, awal, ul, tasa. I wergaz n lɛali, neqqar: "_ argaz-a seg yiles i yetwataf". Atan
Ferḥat ɣas yemmečč si lxudma, d tazzla akka d wakkin ɣef tikta-s d yedles,
ula d arraw-is ur terwin ara, atan ass-a yusa-yaɣ-d ! Awal: awal, ɣur-neɣ yuɣ amekkan d ameqqran. Win yefkan
awal ur t-yexdiɛ ara, win
yeqqaren: "_ awal d awal !",
win yeddan i ddunnit s yiwet n nniyya, s yiwet n tikli, win ixeddmen ayen yeqqar, ayen i s yumen,
yekkat amek ar-a t-yerr yella; win
yeqqaren di tillas "aţţan aţţan walit-ţ" i tafat n tlelli. Wid
yakkit neqqar-asen
irgazen n wawal ! Ferḥat
d yiwen deg-sen: d argaz n wawal ! Tura, tasa: win ţɣidin medden, win yesikkiden ɣer win yenḥafen, wid ireffden
wegma-s ma yeɣli, win ur nezmir ara ad iwali win yelluzen neţţa iteţ, winna
qqaren-as imusnawen-nneɣ: ɣur-es tasa, neɣ yesɛa tasa .
Akka am Ferḥat ! Ul: Win, ayen ur iqebbel
ara i iman-is ur t-iqebbel ara imedden, "_ timeslayin am yemdanen, kif-kif-itent deg
wezref !", win ur nqebbel ara ad yexnunes neɣ ad yessexnunes, win yeggaren
iman-is ɣer yimi n tlafsa, win yeţmaggaren times neţţa idmaren-is ɛeryan, win
mi yeɣli ad yekker, mi thudd a-ţ-yebnu, winna qqaren-as: d argaz
"bbul", ɣur-es ul, neɣ yesɛa "abbul". Ferḥat-nneɣ, daɣen yesɛa "abbul" Ferḥat, bla ma kecmeɣ
deg wallaɣ-is, iktayen-is imezwura (1ers souvenirs) nutni d ttrad lwaḥid i ddukkulen.
Tal tikkelt mi ar-a yessiked Ferḥat ɣer temẓi-ines, asmi yella 5 neɣ 6 neɣ 7
iseggasen, ad yaf yezga ttrad, rrsas lbarud. Erwel, effer, lɛesker deg uzzal
ad sqaqayen, imjuhad i d-yessefqaden, akka deg yid ɣer taddart, ass-a ad
ak-inin yemmut-d leflani, ass-a ad ak-inin yeɣli leflani: idammen, imeṭtawen,tarewla. Di tmura-nniden, arrac qqaren ayen yessfraḥen,
Ferḥat d tezzyiwin-is ţţergigin, arrac lemmden urar, Ferḥat d tezzyiwin-is lemmden tuggdi d
tuffra. Deg-mi ass am ass-a d irgazen n talwit.
Deg-mi ugin takrit (violence), tɛedda fell-asen ?! Deg-mi
mi walan albɛad yebɣa ad yerkked wayeḍ, ad as-inin: "_ Ergu ! mačči akka i nenna, mačči
akka i nnan imusnawen, mačči akka i nnan yemjuhad wid yemmuten ɣef tlelli, ɣef
izerfan, ɣef Tmurt, ɣef Tmaziɣt". Sikkdet kan dɣa ma d lḥeqq aya, ma
tezmer ad tili Tmurt ur Tamaziɣt, neɣ Tamaziɣt ur Tamurt: D ayen ur iqebbel laɛqel . Ayen ur iqebbel laɛqel,
Ferḥat ur t-iqebbel ara ! Ferḥat ilul
deg Yillulen, tura 40 iseggasen-aya. Ur yekcim llakul amezwar atrar (Ecole Primaire)
armi d aseggas 63, ass n 5 di Yennayer, ɣef 12 iseggasen, tuɣ yakan tefra
lgirra, i s-yeqqden tasa, imi s-yečča baba-s. Deg-mi Ferḥat yugi ad ilin
igujilen di Tmurt-a ! Asmi yella d amectuḥ madi ger
6 d 11 iseggasen, yella yeqqar di lgamaɛ deg yIllulen cwit n taɛrabt d cwit n Leqran, d acu kan s
tuffra n Lɛesker Urumi, ihi d amectuḥ madi, 6 iseggasen kan, yeqqar s tuffra.
Di ttrad n Tmunnent, Tavuri n Taɛrabt s tuffra, mi d-tewwed tmunnent n Tmurt,
yeffeɣ laɛtab ɣer tafat: taɣuri n Tmaziɣt ad d-teglu s leḥbus ! Tagrest n 63, qessḥet, ur-ɛad zemmen fell-as 12 iseggasen, Ferḥat, 4 ikilumitren
ssbaḥ 4 nniden tameddit, i usemmid, d acu iceṭtiden yelsa, d acu d učči
yečča. Deg Tuber
63, ma ur skaddbeɣ ara, wwin-t ɣer Lzayer,
yekcem ɣer wexxam n warraw n Ccuhada. Yeqqim din sin iesggasen. Deg 1965, yuɣal-d
ɣer Tmurt, ɣer wexxam n warraw n Ccuhada di Larbaɛa-Nat-Yiraten: din i yeɣra armi imed-d d ilemẓi. Din yebda ileddi allen-is i tmussni, d yedles, d tmeslayt. Imi d neţţa i d lwali n wexxam, d neţţa uɣur i d-ssikkiden watmaten-is,
yeṭtaxer-d si leqraya, yebda yessɣar: yuɣal d ccix. Aql-aɣ di 1968-69. Ihi
yebda yessɣaray armi d 1971. Nniqal iɣil llakul dayen, armi d asmi yesla yella
le Aql-aɣ tura deg
71-72, Ferḥat d anelmad di Lzayer, la yeqqar "Tussniwin n Tsertit"(Sciences
Politiques). Liḥala tẓeyerr daɣen ɣef-tegmat
d imawlan, imi yegga lxudma-s, yernu "_ ziɛma yerra axxam !", "Imesdurar n twaɣit, tawaɣit
tezzi-yasen" Ssyin d tazzla ɣef temsal i t-yessazzalen ar ass-a, tura nnig 20 iseggasen
aya ! _ 1969: Isub ɣer Nnuba Iɣennayen-Uzekka b CCrif-Xeddam _ 1972: Yeɣza almud n lɛud d ssnitra, ger imeddukal-is di Lzayer d tmurt.
Ferḥat dayen yufa abrid-is. _ 1973: yeslal-d Tarbaɛt-Imaziɣen Imula. Tarbaɛt-a tewwi-d
Arraz Amenzu di Tfaska n Lmuziga Tatrart (1er Prix au Festival National de la
Musique Moderne) di Tuber 1973 _ Deg yimir, armi d ass-a Fer¥ḥat d tikli ɣef yedles: _
S tuɣac ( limer
a-ten-id-nebder yakkit, ur nteffeɣ ssya ar d-yali wass !) _
S tira: imagraden (articles) di Tesɣunt Tafsut, Atergem n Tektabin i d-yeffɣen
d iḥricen di Tefsut _
Aḥami n icayyen imeẓyanen _
asali n tuddkliwin, am amussu n yedles amaziɣ (MCB
armi d 89), am tdukkla n warraw n ccuhada, d tin n izerfan n wemdan. Iseggasen
teddun Ferḥat abrid-is
yiwen: iswi iban-as. Ɣas yemlal-d uguren atas, ur yerfid ara i ifassen: asḥillef
(intimidations),
tiyitiwin, leḥbus. 12 iberdan i s-d-luɛan, neɣ i yetwattef!
Armi d 1985, "_ d ameḥbus di Berwaggiya yernu ur xdimeɣ" . D Lambese.
Dinna i s-rrẓan anzaren, ilmend izerfan n warraw n Ccuhada, d tlelliyin n
wemdan. Deg 1987, Ferḥat yeffeɣ-d si Lḥebs.
Deg
1989, iţekki deg wid yessulin Akabar RCD, agraw i lmend n yidles d tugdud, acku
Ferḥat tameddurt-is yakk d idles d tugdut ! Deg 1989, nɣil dayen tlul-d tugdut Ferḥat yessers ssnitra, yeddem abrid usefhem,
d acu i d tugdut d wamek ar-a tali, d wamek ar-a tressi. Amennuɣ ar-id-a
yetkemmil. Ass-a netwali amennuɣ ɣef tugdut mačči d win isehlen, yenned atas,
yal wa deg yaɛdawen-is yekkat amek ar-a t-yeɣdel, ar tura ɛad ur tressa :
yernu widak yeddurin tiɣemmar, widak yeţţaggaden tili-nnsen, widak yessarwaten
berra i wennar tura ban-d: widak iregglen fell-aɣ asmi teḥres, widak yerkan bɣan
ad aɣ-ssimsen, akken i s-yenna win: "_ Uteftuf la yestčefčuf deg-neɣ yessusuf mi d-ɣlin uɣalen ɣur-es !" Ur yetibrik wedfel, ur itekkes yitij di ssmayem. Di ddiq i d-yetban werfiq ! Tugdut twexxer, tebrek tebda la d-tesnunnut ! Atas bdan la
twexxiren, neɣ tḥuffun anida ar-a ssentellent iman-nnsen. Akken ar-a ɛeddin ! Ferḥat atan daɣen, yefka iman-is di
ssef amenzu (en 1ere ligne). Ma teɣli nekkni a-t-nebnu! Abrid-nniden. Dacu kan
d tikkwal asefru, taɣect ugaren "azal-nsen deg waldun" (valent plus
que leur pesant de poudre) akken yeqqar Kateb Yasin. Tamurt-nneɣ, d tamurt n wawal, tameslayt-is d timmawit. Ayen i-wumi yezmer
usefru, ayen i-wumi tezmer taɣect, ur as-yezmir ujirnan, neɣ kra yeţţarun ! Ferḥat ma yuɣal-d ɣer ccna; nekkni
ɣer idisan-is. Tura nezmer a ad nkemmel akka ar d-yali wass,
Ferḥat mačči d aya kan i d-nenna. Aad nfakk s wawal-a: Skud llan yergazen am
neţţa, "_ A yemma, asif ur aɣ-iteţţ ara !" 12/04/92 Asarig a nura-t tura 11 iseggasen-aya i yiwet n tdukkli inelmaden n
tezdawit n Bgayet. Awal ur nekkis, awal ur t-id-nerna. Seg wassen ar ass-a aṭas i yezri ɣer medden, aṭas i yezrin ɣef tmurt, nemceḥ
akal ur nuklal. Freḥat daɣen aṭas i yezrin fell-as. Mačči d izli n tuɣac i d-yessuffeɣ.
Abrid-ines di tesrtit neţţa yenneḍ amur-is, acu kan annect-a
ilaq-as usarig nniḍen. Yiwen wass ad as-nales ! |
Numéro 14 Septembre
2002
Ɣileɣ
d asif Ɣileɣ d asif i d-iḥemmlen ziɣ d ilmeẓyen ɣileɣ d rrɛud i d-yeṭtreḍqen ziɣ d aldun i ten-imegren Mi akken i suɣen ameslay i d-ssuffɣen tilelli iregglen.
Runt tyemmatin nugem-d leḥzen yak tiṛsasin wid i tent-ijebbden kra n win zenden ur t-zggilen
tiyita n lmut yis-s i
kkaten. Iɣaḍ-i wemdan ireffden
yesrus wi ẓzan tiɛfeṛt ad ţ-yemger s ufus ẓzayet tmeddurt ɣef wi
llan ixuṣ ass izeryen igezzem am lmus ɣas udem yeddez tasa tḥuss Suḍen ɣef tnekkra am tcemmaɛt tensa ggugmen warrac yal wa ansi i d-yusa qqujjren iɣallen temmunddel tmara irden di ssmmayem teqqur tara tameɣra n tceqquft ur isufa Run yelmeẓyen d imeṭti i ssumten tebda-d d urar tfukk d idammen s tyita n lmut i ten-kkaten tal timeqqbert deg-s la qqazen teţɣiḍ taddart yeǧǧa usirem. Ɛmer Mezdad 03/08/89 |
Numéro
14 Septembre 2002
Adresse
de messagerie électronique : ayamun2@Hotmail.com
Adresses Web: www.ayamun.com
tanemmirt, i kra iẓuren ayamun, cyber-tasàunt n tsekla imaziàen, ar
tufat !
@Copyright ayamun 2002
Dernière révision : 19 Septembre 2002